Элым аралышын кечыж вашеш Параньга район Элпанур ялысе «Унавий» клубын участницыже-влак «Тепло для героя» Российысе акцийыш ушненыт. Февраль мучаште СВО-што улшо салтак-влаклан 87 мужыр носким пидын колтеныт.
Кидмастар-влакым ушышо «Унавий» клубыш кызыт 16 кова коштеш. Тудым Элпанур книгагудым вуйлатыше Ольга Романовна Янышева вуйлата. Мобилизаций тӱҥалме жап гычак нуно носким пидыныт. Кок ий жапыште боец-влаклан 387 мужыр меж носким колтеныт. Ты пашаш ял гычат икмыняр еҥ ушнен.
– Кызыт моло кидпашам пешыже огына ыште. Носким пидаш тыршена. Меж шӱртым мыланна ялысе предприниматель-влак, вате-марий Надежда Петровна ден Олег Арсентьевич Автономовмыт пуат. Кова-шамыч пеш чолга, тале улыт. Мӧҥгыштышт носким пидыт, вара мушкын кондат. Шукерте огыл ме кок парнян перчаткым пидаш тӱҥалынна. Тудым лӱйкалыме годым кучылташ сай. Носки деч посна ме эше 10 мужыр парняшан пижым, тыгак шампуньым, шовыным, мочылам, одеялым колтенна.
Элпанур школысо йоча-влак 29 серышым возеныт гын, ме – кудытым. Поро тыланымашан кок письмам мыят серышым. Кодшо ганат колтенам. Икмыняр жап гыч спецопераций гыч толшо ик пӧръеҥ мыйым кычалын толын ыле. Сандене кова-шамычым возаш кумылаҥденак шогем. Вет нунылан кызыт тунар носки огыл, а кунар серыш шергакан, – мане О.Янышева.
Элпанур ялысе еҥ-влакын колтымо пижергышт, носкишт боец-влакын кид-йолыштым ырыкташ тӱҥалыт манын ӱшанена. Серыш Марий Эл гыч шокшо салам, шергакан пӧлек дене иктак. Неле жапыште тушман ваштареш пеҥгыдын шогаш кумылаҥда, чоныш куаным пурта. Сандене кажне кумылан еҥ тудым возен колтен кертеш.
О.Янышеван фотожо-влак.