Тенийысе теле ик эн луман пагыт семын шарналт кодеш. Кажне кечын гаяк але арня коден, лум сайынак опта. Тидыже коммунал службылан жапыштыже шке пашажым шукташ йӧндымылыкым луктеш. Яллаште веле огыл, олалаштат корно укелык калыкым тургыжландара. Тидым шотыш налын, Марий Элысе студотрядын еҥже-влак регионысо «Снежный десант» акцийым увертареныт.
Поро кумыл
Ты патриотический акций поро кумылым ончыктышо мероприятий. Ӱдыр-рвезе-влак районлаште илыше шоҥгыеҥ, ветеран-шамычлан тӱрлӧ сурт сомыллан полшаш шонен лектыт. Лумым эрыктымаш – ик эн тӱҥ пашашт.
Тидын нерген акцийлан вуйын шогышо, Марий Элысе студотряд-влакын ик чолга еҥже Саеда Курбанова дене мутланышна. Тудо тыгерак каласкалыш:
– Практике ончыкта, тений «Снежный десант» акцийын кӱлешлыкше моткоч кугу. Тудын тӱҥ шонымашыже районлаште илыше-шамычлан шкешотан полышым пуаш, самырык-влакым патриотизм шӱлышеш кушташ, студотряд-влакын йӱлаш пурышо толкыныштым вияҥдаш.
Садлан шкенан ончылно шуко задачым шынденна: ветеран, шоҥгыеҥ, СВО участник-влакын ешыштлан лумым эрыкташ да тӱрлӧ сурт сомылым шотыш кондаш полшаш; школлаште тунемше ӱдыр-рвезе-шамыч дене профориентационный вашлиймашым, мастер-классым эртараш; яллаште илыше-влаклан концертым ончыкташ; тыгак мемориал, памятник-влак воктенысе кумдыкым шотыш кондаш.
Обществылан сай пашам пырля ыштымаш студотрядын еҥже-шамычымат ушаш полша. Тыге нуно икоян улмым утларак шижыт да поро пашалан эшеат кумылаҥыт.
Килемар кундем, вучо!
«Снежный десант» акцийыш ушнаш шонышо-влакым таче пытартыш кече погат. Тушко 27 ияш марте чолга еҥ-влакым налыт. Тидлан Марий Элысе Студотряд-влакын «ВКонтакте» тӱшкашкышт возен але Йошкар-Оласе Самырык-влак полатыште верланыше штабышкышт толын, йодмашым кодаш лиеш.
– Мемнан деке утларакшым полшаш кумылан, нелылык деч лӱддымӧ, командыште пашам ыштен моштышо ӱдыр-рвезе-шамыч толыт. Шукынжо вуз ден ссузлаште тунемше, студотрядын еҥже-влак улыт. Но ме полшаш кумылан моло ӱдыр-рвезе-шамычын толмыштланат йывыртена.
Пашам тӱҥалме деч ончыч еҥ-влак дене инструктажым эртарена. Вара нуным тӱрлӧ йыжыҥ почеш шеледена. Тыште тыйын опытан але йӧршеш у еҥ улмет кугу рольым огеш мод. Тӱҥжӧ – пашам ышташ кумылет лийже. А виетлан да чонетлан келшыше сомылым ме ойыраш полшена, – радамла Саеда.
Февраль мучаште «Снежный десант» Килемар районыш тарвана. Верысе-шамыч нунын инициативыштлан моткоч куаненыт. А ты районысо администраций кушто полыш кӱлеш, тугай адрес-влакым ямдылен. Ӱдыр-рвезе-влак частный секторышто илыше ветеран да шоҥгыеҥ-влак деке лумым эрыкташ тарванат. Тыгак 5-11-ше класслаште тунемше-шамыч дене вашлияш, верысе книгагудышто да тӱвыра рӱдерыште мероприятийым эртараш шонат.
– Паша планыштына – кудывечылаште да коштмо верлаште лумым эрыкташ, ветеран-шамычын суртыштышт изирак олмыктымо сомылым шуктымаш. Арде селасе колледжыште вашлиймашым да мастер-классым эртарышаш, районысо клубышто концертым ончыктышаш улына. Тыгак СВО участник-влакын ешыштлан полшаш да мемориал-влак воктенысе кумдыкым шотыш кондаш палемденна.
Акцийыш ушнаш шонышо-влак деч йодмаш ятыр пурен. Мемнан деке строительный, педагогический, сервисный, проводник-шамыч отрядын еҥже-шамыч йодмашым колтеныт. Тидыже молодёжьын мут дене веле огыл, а пашалан полшаш шонымашыштым пеҥгыдемда.
Мутлан, «Марий десант» акцийын ончычсо участникше-шамыч ты мероприятийын кӱлешлыкшым пашаште веле огыл улмым палемденыт. Нуно илалше еҥ-шамыч дене чон почын мутланымым, тӱрлӧ илыш историй дене палыме лиймым, команде дене икоян улмым, икте-весе коклаште келшымаш озаланымым пеҥгыдемденыт, – каласкала Курбанова.
«Кушто кӱлына – тушко миена»
Палемдыман, «Снежный десант» Всероссийский акций Российысе студотряд-шамычын ик эн кугу пашаштлан шотлалтеш. Тудо: «Кушто кӱлына – тушто лияш тыршена» шонымаш почеш илышыш пурталтеш. Тыгай шотан мероприятийым эртарымаш регионысо ӱдыр-рвезе-шамычын тылеч ончычат лийын. Кундемыштына тудым «Марий десант» маныныт. Кызыт нуным «Йошкин пырыс» ден «МариWell» отряд-влаклан шелыныт.
– 2018 ий годсек районлашке коштына. Ик ийлан 2-3 кундемым авалтена. Тачысе кечылан Оршанке, Звенигово, Параньга, Марий Турек да моло вереат лийынна. Кажне ийын акцийыш шӱдӧ утла еҥ ушна. Тыгак пий-шамычын «Динка» приютышто чӱчкыдын уна улына. 2018 ий марте олаште илыше ветеран-шамыч деке мӧҥгышкышт лектеденна, оласе уремлам эрыктенна, – манеш ӱдыр.
Саеда Курбанова регионысо «Снежный десант» акцийым виктара. Но ты сомылым команде шукта, манеш. Тыште регионысо студотряд-влакын, штабын, районысо администрацийын да молынат надырыштым палемда. Икте программым ямдыла, весе маршрутым чоҥа, кумшо ӱдыр-рвезе-шамыч дене пашам ышта. Икманаш, чылан пырля тыршат.
«Снежный десант» акцийын йӱлаже тек шуко ила да поро кумылан еҥ-влакым уша.
С.Курбанован альбомжо гыч налме фото-влак.