Кодшо кугарнян Самырык-влак полатыште «Единство в дружбе» 10-шо Национальный культур молодёжный фестиваль почылтын.
Уэмдыме полатым Марий Элым Вуйлатыше Ю.Зайцев ончен савырнен. Капитально олмыктымо пашам шуяш ешартыш окса 2024 ийыште толшаш. Ты сомыл «Регион для молодых» молодёжный политикым комплексно вияҥдыме программе почеш субсидий кӱшеш шукталтеш.
Тыгак Ю.Зайцев «Народы мира» выставкым ончен. Фестивальын участникше-влакым саламлышыжла ойлен: «Келшымаште – икоян» тиде тыглай шомак огыл, тудо чыланнам иктыш уша. Тышеч каеда гынат, тиде тӱвыран ужашыжым пеленда наҥгаеда. Тек ончыкыжымат ты фестиваль лиеш. А таче ме мотор, шкешотан да волгыдо еҥ-влакын пайремыштым ужна».