12 февральыште Марий Эл ден Татарстан коклаште вашкыл шотышто ойпидышым ыштыме.
Озаҥыште
Тудым Марий Элым Вуйлатыше Ю.Зайцев Озаҥыш мийымыж да Татарстан Республикысе промышленность да торговльо министерствын коллегийышкыже ушнымыж годым подписатлен.
Мероприятий деч ончыч Ю.Зайцев промышленный сату выставкым шергал лектын. Тущто 50 предприятий ден вузын сатуштым ончыктымо.
Пошкудо кундемыште кӱкшӧ технологиян 1000 утла промышленный сатум ыштен луктыт; оборонно-промышленный комплекс ден радиоэлектронике предприятий-влак вияҥыт (регионысо валовый продуктышто нунын ужашышт – 20 процент). Кочкыш сатум лукшо предприятий-влакат пашам пырля ворандараш тӱҥалыт.
Ю.Зайцевын палемдымыж почеш, вольыкым ончымо да перерабатыватлыме производство шотыштат кугу инвестициян проектым илышыш шыҥдараш тӱҥалыт.
Тыгак палемдыме: пошкудо кундемлаште транспорт инфраструктур шотышто чарак лийшаш огыл; лишыл жапыште Зелёный Дол – Яраҥ кӱртньыгорно йодыш рашемдалтшаш; сатум кондыштарымаште кызыт Йошкар-Оласе аэропортышто чоҥалтше пассажирский терминалат кугун полшышаш.
Татарстаныште туризмат сайын вияҥеш. Республикыште илышылан 1,5 туристым шотлен луктыныт. Пытартыш кок ийыште Марий Эл гыч Татарстаныш кок пачаш шукырак турист миен толын.
2023 ийыште Марий Эл «Россия – Исламский мир» тӱнямбал экономический форумыш, «МиР. Магазин и Ресторан» тӱнямбал ярмиҥгаш ушнен. Тушто лийше 40 процент организаций дене республикна сату шотышто контрактым ыштен.
Алабуго ден Челнаште
Ты кечынак Марий Элын делегацийже (тудым республикысе Правительстве Председательын алмаштышыже Д.Троицкий вуйлатен) «Алабуга» экономический зоныш да Набережный Челнасе «Мастер» Камский индустриальный паркыш миен коштын.
Участник-влак зонын ойыртемже да пашаж дене палыме лийыныт, паркыште могай инфраструктур кӱлмым шымленыт.
Саде проектым кундемыштат илышыш шыҥдараш шонат. Тидлан лӱмынак пашаче группым чумырымо. Республикыште посна экономический зонышто таможенный зоным ышташ палемдыме.
Д.Троицкийын ойлымыж почеш, тушко миен ончымаш Марий Элысе инвестиционный потенциалым кугемдымаште практический шинчымашым налаш полшен.
Эльвира Терентьева.