18 июньышто Ленинград область Всеволожск оласе «Песчанка Паркыште» Пеледыш пайрем ден Акатуй чуваш пайрем эртаралтыныт.
Тушко «Марий памаш» ансамбль дене пырля «Кугарня» газетын пашаеҥже Валентина Семёнова миен коштын.
Пайремыш толшо уна да участник-влакым Чуваш Республикым вуйлатыше О.Николаев, Ленинград областьысе калык да конфессий-влак кокласе кыл комитетын председательжын алмаштышыже А.Панов, Ленинград областьысе чуваш тӱвыра ушемым вуйлатыше В.Гаврилов да «Ший корно» Марий национально-культурный автономийын председательже Е.Соловьёва саламленыт.
Сценыште «Кугарня» газет редакций лӱм дене Евдокия Соловьёвалан идалыкысе газет подшивкым да марий йылмым, тӱвырам аралымаште лектышан пашажлан таумут кагазым кучыктымо.
Ты кечынак «Шке тӱвырана дене кугешнена» регион-влак кокласе конкурс-фестиваль эртен. Участник-влак Башкортостан, Чуваший, Марий Эл, Моско да Ленинград областьла гыч толыныт — чылажге 65 еҥ. Тушто «Марий памаш» ансамбльыш коштшо Кристина Краснова мурым йоҥгалтарен.
Конкурсын иктешлымашыже куандарыше: кокымшо да кумшо верла марий-влаклан логалыныт. Кумшо верым «Югорно» ма-
рий ансамбль ден Выборг ола гыч Екатерина Павлова налыныт. Кокымшо верым кок коллектив пайлен: «Марий сем» ансамбльын кӱслезыже-влак Юлия Венкиль ден Елена Таникова да Ленинград область гыч совла дене шоктышо «Задоринка» йоча ансамбль. Палемдыман, руш йоча-влак марий сем почеш совла дене перкаленыт.
«Санар» (Чуваший) да «Пилеш» (Башкортостан) чуваш фольклор ансамбль-влак икымше лийыныт.
Могай калык пайрем модыш, ярмиҥга деч посна?! Кажныже шке кудыжым ончыктен. Тыште марий кочкышым, книгам, ойыртемалтше тӱрым, курчакым, вургемым, сӧрастарыше арвер-влакымат калык ончык луктыныт. Марий кудышто уста тӱрлызӧ Надежда Исаченко марий аралтышым йоча-влаклан тӱрлаш туныктен. Спортплощадкыште Ирина Тойгильдина «Шокшо пареҥге» модыш дене изижымат-кугужымат модыктен. Профессионал сӱретче Андрей Дубников портрет ден шаржым сӱретлен.
Патырлык койышым ончыкташ кирым нӧлтыштмашым, армрестлингым, лӱйкалымашым, керешу чуваш кучедалмашым организоватленыт. Пытартыш таҥасымаште сеҥыше пӧръеҥлан тагам пӧлеклышт.
Кинде-шинчал дене порын вашлиймыштлан, шочмо тӱвыранам да йӱланам вияҥдымаштлан Ленинград кундемыште илыше марий-влаклан таум ыштена.
Валентина СЕМЁНОВА.