23 августышто Мордовий Республикын Саранск рӱдолаштыже Национальный коллектив-влакын творчествыштын пӱтынь Российысе «Мы вместе» марафонышт эртен. Тудо Российысе калык-влакын икоян улмыштым ончыктышо площадке лийын.
Фестивальыш элнан тӱрлӧ кундемже гыч мурышо да куштышо коллектив-влак, кидмастар-шамыч погыненыт. Усталык коллектив-влак шке калыкышт нерген каласкаленыт, илыш-йӱлашт дене палдареныт, мурым муреныт. Пайремыш пу, олым, омыж, ний, шунрок гыч тӱрлӧ пӧртарверым, модышым ончыкташ да ужалаш конденыт. Тиде кечын Саранск ола мучко 10 утла тӱрлӧ площадке пашам ыштен.
А.С.Пушкин лӱмеш Национальный книгагудо воктене «Мордовийын этнокультурный поянлыкше» площадкыште «Марий сылнымутан литератур дене палыме лийме» шагат эртаралтын.
Тушко Марий Эл гыч «Ончыко» журналын тӱҥ редакторжо Игорь Попов, «Кугарня» газетын пашаеҥже Татьяна Попова миеныт. И.Попов мордва да марий писательвлакын ожнысо да кызытсе кылышт нерген докладым ыштен.
Пытартыш идалыкыште «Ончыко» журналеш мордва поэт-влак Геннадий Гребенцовын да Рая Орлован почеламутышт савыкталтыныт, а «Чилисема» эрзя йоча журналын 2024 ий 7-ше номерыштыже – вич марий авторын (А.Тимиркаевын, Г.Оярын, С.Григорьева-Сотон, И.Поповын, Ю.Соловьевын) возымышт.
Эрзя да мокша йылмыла дене савыкталтше «Сятко» ден «Мокша», йоча-влаклан лектын шогышо «Чилисема» ден «Якстерь тяштеня» журналшамычын коллективышт дене мутланымаш пайдалын эртен.
Тиде мероприятий годымак йоча писатель, Мордовийын сулло поэтше Геннадий Гребенцовын «Лум шӱдыр» марла лекше книгажын презентацийже лийын. Презентацийлан лӱмын Йошкар-Оласе 2-шо номеран школын тунемшыжевлак (туныктышышт – Л.Алексеева), «Лум шӱдыр» книга гыч почеламут-влакым сылнын лудын, видеош войзен колтеныт ыле. Акцийыш ушнышо кажне йочалан да нунын туныктышыштлан организатор-влак Почётан грамотым колтеныт.
А Мордовийыште ЙошкарОласе 30-шо номеран йочасадыш коштшо Дарья Попова книга гыч почеламут-влакым марла да рушла лудын.
Пайрем лӱмеш «Марий книга издательстве» савыктыш пӧрт А.С.Пушкин лӱмеш Мордовий Республикысе национальный книгагудылан да Йоча книгагудылан книгавлакым пӧлеклен.