Марий Элым Вуйлатыше Ю.Зайцевын кӱштымыж почеш Правительстве пӧртыштӧ религий дене кылдалтше ушем-влакын пашашт шотышто заседаний лийын. Тудым Марий Элысе Правительстве Председательын икымше алмаштышыже М.Васютин эртарен.
Участник-влак самырык-влак коклаште этнический да религиозный экстремизмлан вияҥаш огыл манын, кӱлеш мерым приниматлыме шотышто йодышым тарватеныт. Тыгак 2023 ийысе паша планым лончыленыт.
1 апрельлан кундемыштына 179 религиозный организацийым регистрироватлыме. Олаласе да районласе кажне администрацийыште нунын дене пашам ыштыше Совет-влак улыт. Кажне ийын Совет-влакын республик кӱкшытан заседанийышт эртаралтеш. Тушко администраций вуйлатыше, Правительстве пашаеҥ да ушемын еҥже-влак ушнат. Тенийысе заседанийыште Ю.Зайцеват лийын.