17 майыште Йошкар-Олаште Калык-влаын келшымаш пӧртыштым торжественно почыч. Тылеч вара тушто икымше кугу мероприятий – студент-влакын «Финн-угор калык-влакын поянлыкышт» X тӱнямбал форумышт пашажым тӱҥале. Тений тудо Туныктышын да наставникын идалыкыштлан пӧлеклалтын.
Лу ий жапыште ты форумыш элнан 30 наре регионжо гыч кок тӱжем утла еҥ ушнен. Нуным тӱҥ шотышто ик шонымаш уша – шочмо калыкын тӱвыражым, йӱлажым, йылмыжым йӧратымаш да пагалымаш. Садлан самырык еҥ-влак ончылно тудым вияҥдыме, тӱзатыме задаче ончыл верыште шога. Нунын ушан шонымашышт, яндар шинчаончалтышышт шочмо калыкыштын курымла дене арален толмо сомылыштым ончыкыжымат ӱшанлын вӱден наҥгаят манын, ӱшаным пуа.
Тенийысе форумат финн-угор тӱшкаш пурышо, тӱрлӧ кундем гыч толшо ятыр ӱдыр-рвезым, туныктышо ден шанчыеҥым чумырен. Форум кок кече шуйнен. Икымше кечын участник-влак пленарный заседанийыш ушненыт. Тушто этнотӱвырам аралыме, тӱрлӧ национальностян самырык еҥ-влак кокласе кылым вияҥдыме, тӱвырам ик эн кугу поянлык семын аклаш кӱлмӧ нерген докладым ыштеныт. Тылеч вара доклад-влак шотышто каҥашымаш лийын. Кечывал деч вара секцийлаште пашам ыштеныт. Тушто финн-угор калык-влакын йылмышт, литературышт, фольклорышт, йӱлашт, тӱвырашт, сымыктышышт, образованийышт, инициативышт нерген докладым ыштеныт. Тидлан илышыш шыҥдарыме тӱрлӧ проект да опыт гоч мом ышташ лийме шотышто палдареныт. Тӱвыргӧ паша деч вара форумын участникше-влакым культур программе вучен. Тушто нуно марий калыкын поян тӱвыражым шке шинча дене ужын кертыныт.
Кокымшо кечынже участник-влак Козьмодемьянскысе тоштер комплексыште лийыныт. Тылеч вара форумын пашажым иктешленыт.
«Нармоннят» кумылын ушнен
Форумыш Мордовий Республикысе кугыжаныш университетын «Нармоннят» (кайык-влак) ансамбльже толын. Тушто куд ӱдыр уло. Вуйлатышышт – ты вузысо филологий факультетыште, кумшо курсышто тунемше Александра Родионова. Ансамбльын репертуарыштыже мордва калыкын мурыжо да куштымашыже улыт. Муро-влакым нуно рушла да мокшала йоҥгалтарат. Ӱдыр-влакын палдарымышт почеш, кызыт университетыштышт мордва (мокша, эрзя) йылмым тунеммылан кугу тӱткыш ойыралтеш, тидын шотышто шуко паша шукталтеш. А форумыш толмышт нерген шке шонымашыштым тыгерак радамлышт:
– Форумыш икмыняр гана толынна. Тылеч ончыч доклад-влак дене выступатленна. Тений ансамбльын кажне гаяк участникше тӱрлӧ тематике дене секцийлайште докладым ыштен. Тыгак концертыште мастарлыкнам ончыктенна. Мыланна форум моткоч келша. Тудо мемнам родо, пошкудына-влак дене икояным ышташ полша. Тылеч посна икте-весым сайынрак пален налаш, у йолташ-влакым муаш йӧным ышта.