
22 сентябрьыште Марий Элысе палыме самодеятельный композитор да мурызо Виктор Комаров лӱмгечыжым палемда. Шке манмыжла, тудлан 720 тылзе темеш. А 27 сентябрьыште Йошкар-Оласе Ленин лӱмеш тӱвыра полатыште концертым эртара. Шочмо кечыж деч ончыч Виктор Иванович дене вашлийын мутланышна.
1980 ийыште В.Комаров Йошкар-Оласе президентский школым визытан отметкылан гына тунем пытарен.
1990 ийыште – Марий Кугыжаныш университетын Ялозанлык факультетшым («Агрономий» специальностьым налын).
1992-1997 ийлаште Я.Эшпай лӱмеш Марий кугыжаныш филармонийыште пашам ыштен.
– Палена, ятыр ий Москош кудалыштында. Кызыт кушто пашам ыштеда?
– Ноенам, канем. Икана шкенан колхоз гыч орол мыйым кучыш да ик еҥ ок сите, пашаш тол, мане. Йӧра, шонем, Моско деч каналтем – лу ий тушко кудалыштынам. Тыге ынде кокымшо тылзе ялыште «канем».
– Концертда дене чӱчкыдынжак огыл калыкым куандареда…
– Кажне вич ийлан юбилей лӱмеш Йошкар-Олаште концертым эртарем. Кызыт 27 сентябрьлан пешак ямдылалтам. Фонограмме почеш огыл, сценыште шке шоктен-мурем. Садлан, гармоньым чӱчкыдынрак кидыш налын, репетицийым эртарем. Программыште – ончыч возымо да у муро-шамычат. У муро-влакым «до автоматизма» манмеш шукташ кӱлеш.
– Шочмо кече вашеш могай-гынат иктешлымашым ыштат. Вич ий ончычсо концертда деч вара илышыштыда могай кугу вашталтыш лийын?
– Эн тӱҥжӧ – ешым чумыренам. Пелашем – пошкудо Шӱдысола гыч. Ик кече чыла вашталтен. 2018 ийыште 8 Март пайрем концертым Кельмаксолаште эртаренна. «Лидат толын!» – Валера шольым мый декем куржын толын манын тунам. Молан мыйын Лидам – йодыш лектеш. Тудын дене эше школ пагыт годсек палыме улына, икымше йӧратымашем. Варажым мый Йошкар-Олаш тунемаш каенам, Лида эше школышто тунемын. Кызыт Советский районысо эмлымверын поликлиникыштыже медшӱжарлан пашам ышта.
– Икымше йӧратымашым 35 ий эртен вашлиймеке, Тендам могай шижмаш авалтен?
– Каласаш лийдыме. Илыш нерген ятыр кутыренна. 35 ий жапыште илышыштем шере-кочыжат шуко вашлиялтын. Лиданат шке ешыже лийын, икшывыже-влак кушкыныт. Мый – ойырлышо, тудат – тыгак. Конфетно-букетный манме жап ик ий шуйнен. А 2019 ийыште возалтынна.
– Комаровмыт ешыште кече кузерак эрта?
– Кельмаксолаште илена. Лида эр гыч кас марте – пашаште. Мый сутка пашам ыштем да кокытым канем. Вольыкым огына ашне – иктаж паша дене каяш кӱлеш гын, пӧртым тӱкылен кодена да вольыкым пукшымо-йӱктымӧ шотышто тургыжланышаш уке. Шукерте огыл у эҥырварам налынам – 35 ий жапыште икымше гана колым кучаш миенам. Ынде вӱд воктек чӱчкыдынрак кошташ тӱҥалам. Пӱртӱсыштӧ пырля лияш йӧратена, поҥгым погена…
– Пелашдалан мурым пӧлекледа?
– Мурымат, почеламутымат.
– «Тунам, 35 ий ончыч, ойырлыман огыл ыле, йоҥылыш ыштенам» манын кызыт чаманымаш уке?
– Самырыкем годымак Лидам марлан налам гын, шукертак ойырлена ыле, шонем (шыргыжеш. Авт.). Илышыште ниможат арам ок ышталт. Чыла тыгакак лийшаш ыле. Кызыт ме коктынат илышын школжым эртенна, опытан улына. Икте-весынам утларак пагалаш, йӧраташ да аклаш тунемынна.
– Концертлан ямдылалтмаште пелашдат полша?
– Эре. Каҥаш денат, паша денат. Таче теве мыйым Йошкар-Олаш ӱпым тӱредыкташ конден (адак шыргыжеш. Авт.).
– Шуко шочшан ешыште кушкында. Лишыл еҥда-влак концертышкыда рӱж погынен толыт, очыни?
– Иза-шольо ден ака-шӱжар-влаклан иканаште чылан погынаш чӱчкыдын ок логал: икте-кокытшо садак толын огыт керт. Изам, мутлан, Тамбовышто ила, эре ок тол. Такшым ешыште кандашын кушкынна, кызыт шымытын кодынна: ныл эрге да кум ӱдыр.
– Мурыда-влак утларакшым мыскара сынан улыт гынат, нуно иктаж-могай кугу илыш проблемым авалтат да шонаш таратат. Муро кузе шочеш?
– Шукын мурылан темым темлат. Но мыланем теме шке «ок тол» гын, возымаш уке. Мурым илыш шке шочыкта. Мыскара семын келыштарен мурем гынат, темыже серьёзный улыт. Тӱҥжӧ – калыклан лишыл лийже, шонем. Ончыч концерт дене ятыр кошталтын, илыш шолын. Теме почеш теме – возо гына. Кызыт изиш лыпланенам. Ончыч мутым возен пыштем. Эрдене кынелын, лудын лектам, тӧрлем. Лидалан лудаш пуэм, кокланже мутым кузе вашталташ манын коктын шонена.
– Виктор Комаровын кызытсе илышыштыже мо эн тӱҥ?
– Еш пиал. Тидым нимогай концерт, гастроль дене вашталташ ок лий.
– Усталык пашадам йӧратыше-шамычлан ончыкыжым мом вучыман?
– Мурым тыгакак возаш тӱҥалам. Мурем-влаклан клипым войзаш шонымаш уло. Кызыт вет шукын телефонышто «пургедаш» йӧратат. Клип-влакем соцкыллаш вераҥдаш шонем.
– Тау, Виктор Иванович! Шушаш шочмо кечыда дене саламлена. Концертыштыда вашлиймешке!
В.Поликарповын фотожо-влак.