Оршанке районысо Зрыв (Табашино) ерым Российысе эн келге ер-влак спискыш пуртымо. Тудын келгытше 55-57 метрыш шуэш. Ер чуяка форман, лопкытшо – 260-400 метр, кужытшо – 800 метр, кумдыкшо – 26,2 наре гектар.
1974 ийыште тудым пӱртӱс памятниклан шотлаш тӱҥалыныт. Республикыштына веле огыл, Юл кундемыштат ик эн палыме да мотор ерлан шотлалтеш. Ты кумдыкысо вӱдым, тушто илыше янлыкым да кушкылым оролат. Ерыште нужгол, олаҥге, чабак, карака, шемгол, мокшынчо, шереҥге, вишкыле, рак илат. Тусо вӱд моткоч ару. Ер воктенак Пижанка эҥер йоген эрта. Кечывалвел-касвел могырышто Табашино села, Флора да Лавр лӱмеш тошто черке верланеныт.
Марий Элыш толшо уна-шамыч деч мотор пӱртӱс, яндар юж нерген, еҥын поро да тыматле улмыштым чӱчкыдын колына. Сандене мотор Йошкар-Олам ончал савырнымеке, районлашкат лекташ уто огыл. Тушто верланыше ер ден, эҥер воктене, курык ӱмбалне, чодыра ден олык лапыште, памаш лекме верлаште лиймеке, вий-куатым погаш, тазалыкым пеҥгыдемдаш, вуйым кандараш сайынак лиеш.
Марий Элысе туристический-информационный рӱдерын сайтше гыч налме фото.