Шукерте огыл интернет тӱняште эше ик марий тӱшкалан шукеме. Тиде «Кечын» лӱман шкешотан телеграм-канал. Тудым Пошкырт кундемын ӱдыржӧ Оксана Николкина вӱда.
– Телеграм-каналым почаш ик ий ончычак шоненам, но кызыт веле тидлан «кид шуын». Мый марий йӱлам, тӱвырам изинек ужын кушкынам. Моло йоча дене модын коштмо олмеш коча-кова-влак воктен шинчылтынам, кузе да молан тыге йӱлам шуктат, умылаш тыршенам, йодыштынам. Шанче литературым, шымлыме паша-влакым лудынам. Ийготым погымо семын шинчымаш шондыкем пойдаралтын. Ынде тиде поянлыкем дене пайлалтам.
Интернетыште марий калыкын историйже, йӱлаже, тӱвыраже дене кылдалтше иктеш чумырымо материал шагал. Посна площадке тидлан уке. Мутлан, ӱдыр, марлан лекмеке, марий йӱлам ешыш шыҥдараш шона гын, могай сийым ямдылыман, огеш пале. Тыгак самырык еҥ марий шӱлышан, но шочмо йылмыжым ок пале гын, тудат шканже кӱлеш уверым ты каналыште муын сеҥа. Кызытеш чыла тидын нерген рушла возем, но ончыкшым марла текстымат (рушла кусарыме дене пырля) пурташ шонем, – ойлыш Оксана.
– А молан лач тыгай лӱмым ойыренат?
– «Кечын» вес семынже кажне кечын. Пайремыште марий вургемым чиен, марла кандырам «пунен» але кова-коча дене уналыкеш толмо годым веле огыл марий улметым шарналтыман. Марий улмым кечын шарныман!
Тыгак пӱртӱсым аралыме, кугурак-влакым пагалыме шотым палыман, осал ден сайым ойырен моштыман, порылан поро дене вашештыман. Тиде – марий еҥын илыш законжо.
– Материал-влакым каналыш иктаж план почеш вераҥдет?
– Шкемын изи планем уло, но тудым мый алмаштен кертам. Тыште нимогай обязательстве уке. Телеграм-канал ойыртемалтеш. Тудо книга але шымлыме статья гай огыл. Шке аламогай куштылгылыкшо лийшаш да кеч-могай ийготан еҥлан оҥай чучшаш.
Шукыж годым мый тушко шке шонымашем возем.
– Постым лукмо деч ончыч иктаж кугурак еҥ дене каҥашет?
– Уке, лукмеке веле лудын ончыктем. Мутлан, авайлан. А еҥ дене каҥашет гын, шонымаш вес могырыш савырнен кертеш. А мый шке шинчаончалтышем дене палдарем.
Йодыш лекме годым ачайын полышыжлан эҥертем. Тудо шуко пала да мыланем умылтара.
– Каналым вӱдаш пашат огеш мешае?
– Кеч-могай паша уло гынат, хоббилан жап да вер эре лийшаш. Мыят «Кечынлан» жапым муашак тыршем. Шукыж годым малаш вочмо деч ончыч пост-влак возалтыт, но кажне кечын огыл. Текстым тергаш шуко жап кӱлеш. Кок кече ом возо гынат, нимат огыл, иктат ок вурсо.
Антонида Япаева дене прыля.
Оксана Пошкырт кундем Мишкан район Чорай селаште шочын-кушкын. Ача-аваже туныктышо улыт, коктынат Яныш Ялкайн лӱмеш Чорай школышто тыршат. Ачаже Евгений Михайлович историй ден краеведенийым туныкта. Аваже Римма Минаглиевна тӱҥалтыш класслам шинчымаш тӱняш вӱден пурта. О.Николкина Уфа олаште Башкирский кугыжаныш медицинский университетыште фармаций факультетыште шинчымашым поген. Кызыт ик компанийыште пашам ышта. Пашаже тӱҥ шотышто компьютер дене кылдалтын.
Ӱдырын альбомжо гыч налме фото.