Йошкар-Олаште Сорокинмыт ешыште 28 сентябрьыште шочшо да олаштак кушшо Андрей Александрович тений 28 ияш лиеш ыле, но тудо курымешлан 25 ияшак кодеш.
Эргым, эргымжат
«Эргым, эргымжат, Андрей! Мландымбалнысе Шочмо кечет дене саламлем! Эн шерге, эн йӧратыме айдемем, шӱмбел шочшем. Тый илышем волгалтарышыч. Ӱшанем, ончыкылыкем ыльыч… Эргым, шӱм падырашем, чылаланат тылат тау! Проститле мыйым! Проститле, тыйым арален налын шым керт. Тыгай кӱчык ӱмыран лийметланат мыйым проститле!»
Раисия Сорокинан интернетысе лаштыкыштыже тиде возымыжым лудам да шӱмем койын туртеш, туртмыж семын оҥем корштарен иша, а шинчавӱд – туштак, шӱргӧ мучко йогенат вола… Ава шке мутшо пеленак Елена Вальтерын почеламутшым вераҥден:
«Ончыланем фотом шарен оптем,
Тый кажныж гыч шыргыж ончетыс мыйым.
Нигузеат мый ӱшанен ом керт
Уке улметлан ты тӱняште, эргым».
– «Эргыч колен» манмыштлан мый тачат ом ӱшане, – ойла Раисия Васильевна. Кажне мутшым пелештымыж семын шинчаже койын вӱдыжга, а шкеже мылам военкомат гыч толшо кок извещенийым шуялта. Казна кагазеш ончылгоч печатлен ямдылыме корныла коклаш ручка дене лӱмнерым да уверым возен шындыме. 2022 ий 7 апрельысе извещенийыште контракт почеш служитлыше ефрейтор Андрей Александрович Сорокин 2022 ий 27 февральыште увер деч посна йомын манын палемдыме. А вет 27 февраль гыч 7 апрель марте ик тылзе утла жап эртен. Вучымо годым кажне секундшо идалыкла чучешыс! Марий ӱдырамаш эргыжым шке гыч кычалаш тӱҥалын, кузе тиде ышталтын – ынде шкеже гына пала. Чаманышыжат, полшаш тыршышыжат, ӱмбакыже кугу йӱкын ойлышыжат, мыскылышыжат лийыныт… А ава эргыж деч уверым садак кажне кечын вучен!
Кокымшо извещений пел ий эртымек(!) толын: «…Ваш сын, старший разведчик-сапер ефрейтор к/сл. Сорокин Андрей Александрович, 28 сентября 1996 г.р., героически погиб 27 февраля 2022 года при выполнении задач в ходе специальной военной операции на территории Луганской Народной Республики, Донецкой Народной Республики и Украины. 25 августа 2022 года». Пел ий гыч авалан парня гай ик падыраш эргыже олмеш неле колоткам конденыт… 30 августышто пытартыш корныш ужатеныт…
Студент илыш, мер паша
Андрей ешыште – ик йоча. Вич ияшыж годым ачаже, полиций майор, вес кундемыш пашам ышташ каен. Ик жап эргыж ден пелашыжым уна семын вашлиеден, а вара коклаштышт корно койын кужемын. Тыге йочасадыште пашам ыштыше Раисия Васильевна шочшыжым шкетын ончен куштен. Андреят аважын кумылжым волтен огыл: чулым, чолга, ушан кушкын. 23-шо номеран школышто тунеммыж годым «Олимп» йоча спортшколыш коштын, греко-римский кучедалмашын чыла шӧрынжымат авалтен, эсогыл тунем лекмекыже, «спорт судья» лӱмым сулен.
Андрей Сорокинын чыла тӱрлӧ усталыкше Поволжский кугыжаныш технологический университетыште бакалавриат ден магистратурышто тунеммыж годым почылтын. Тӱҥ программе деч посна ешартыш шинчымашым Йошкар-Олаште гына огыл, Москошто, Самарыште, Карелийыште поген. Кажне рӱдержын але тӧнежшын лӱмжым возаш гын, газетын пел лаштыкшым налеш – тунаре тиде рвезын дипломжо ден сертификатше улыт. Иктешлен ойлаш гын, Андрей Сорокин айдемылан икымше полышым пуымо шотышто шинчымашым поген, подводникын профессийжым налын, 3-шо разрядан утарыше, детско-юношеский туризмын инструкторжо лийын. Тиде тудлан кӱлын, вет 1-ше курсыш тунемаш толмекыжак, рвезым университетын «Волгатех» пожарно-спасательный студент отрядшын командиржылан сайленыт.
Тиддеч посна Андрей регионысо, Юл кундем федеральный округысо, Россий кӱкшытысӧ шуко конкурсышто моштымашыжым терген. Ятыр гана сеҥышыш лектын. Российысе «Студент года» национальный премийын лауреатше кок гана лийын. Тудо «Человеческий фактор» таҥасымашын, «Лидер XXI века», «Доброволец России 2020» конкурс-влакын сеҥышыже. Тиде радамым умбакыже ешарен возаш лиеш.
А волонтёр семын мыняре тыршен?! Волонтёр семынак 2018 ийыште Францийыш миен, EVS проектын участникше лийын. Кеҥеж каныш жапыште Российысе йоча лагерьлаште вожатыйлан пашам ыштен. Спортын алтимат видше дене Российысе таҥасымашлаште модын. Шовын вӱд дене тӱрлӧ кугытан шӱвыроҥым мастарын ыштен, йоча-влаклан шоум ончыктылын. Шке йырже изижымат, кугужымат чумырен моштен.
Студент улмыж годымак шуко Чап грамотым, «Всероссийский студенческий корпус спасателей» мер ушемын, Россий МЧС-ын медальыштым сулен.
Нине наградылаж деке Россий Президентын 2022 ий 11 октябрьысе Указше почеш Патырлык орден ешаралтын. Туддене Андрей Александрович Сорокиным колымекыже наградитлыме.
Тыге лийшаш огыл!
2020 ийыште армийыш кайымекыже, Андрей Псковысо 64044 номеран войсковой частьыште контракт почеш кок ий служитлаш келшен. Опытан салтакым вигак спецназыш налыныт. СВО увертаралтмеке, кумшо кечылан эрдене Главразведуправлений спецназын 2-шо отдельный бригадыжын разведчикше-влакым Харьковыш колтеныт, нунын коклаште Андреят лийын… Мемнан салтак-влак тушто тул коклаш логалыныт. Бригаде кок ужашлан шелалтын, кок вережат талын кредалын. Андреймыт 134-ше номеран школыш пурен шуктеныт. Лу шагат жап нуно школым кученыт, кум штурмым чытеныт, но полышым вучен шуктен огытыл. Пытартышлан нацбатальон зажигательный снаряд дене лӱйкален, школ деч нимоат кодын огыл, манаш лиеш…
– Кугу таум каласем Поволжский кугыжаныш технологический университетлан, кушто эргым тунемын, да тыгак йолташыже-влаклан. Кок ий утла эртен гынат, нуно мыйым тачат огыт мондо. Эргымым порын шарнат, тидыже мылам эн шерге, – ойла Раисия Васильевна.
Андрей Сорокинын йолташыже чынак пеш шуко: Йошкар-Олаште, Марий Эл ден Россий мучко да йотэллаштат. Уке лиймыжлан тынар жап эртен гынат, Шочмо кечыж дене саламлат, пырля войзалтме фотосӱретыштым интернетыште вераҥдат. Андрей Сорокиным шарнен, Поволжский кугыжаныш технологический университетын преподавательже ден студентше-влак тудын лӱмеш сплав-походым эртарат. Ректорын 2023 ий 10 февральысе пунчалже дене «Волгатех» пожарно-спасательный студент отрядлан ончычсо командирже Андрей Сорокинын лӱмжым пуымо. А Йошкар-Оласе депутат-влакын пунчалышт дене 23-шо номеран школ пырдыжеш ончычсо тунемшыжлан шарнымаш оҥам вераҥдыме.
Андрей пеш поро, чулым, чолга, ушан, чыла вере шушо, чылалан полшышо, шыргыжше… «лийын» манаш йылме ок савырне. Ик йолташыже, Йошкар-Ола гыч Андрей Бахтин (туддене СВО-н участникше семын Марий Элысе Кугыжаныш архивлан интервьюм возышна. – Авт.), дене мутланымем годым Андрей Сорокин нергенат мут лекте.
– Андрей дене ик школышто тунемынна, – мане Андрей Бахтин. – Юзо вашталтышым ышташ лиеш гын, мый, шонен шогыде, кызытак олмешыже каем да Андрейым мӧҥгышкыжӧ колтем ыле, аваж деке, йолташыже-влак деке. Тудо кече гай, кече семынак мландымбалне кӱлеш…
Анфиса ЭМАНОВА.