Кундемыштына Аван кечыжлан пӧлеклалтше шуко мероприятий эртаралтын. Йошкар-Олаште Сеҥымашын ХХХ идалыкше лӱмеш тӱвыра полатыштат ятыр мероприятий лийын. Иктыже «Кече йымалне шокшо, ава пелен порылык» маналтын.
Концертым «Сударушка» ансамбль почын. Тиде ансамбльым Марий Эл Республикысе тӱвыран сулло пашаеҥже Зоя Березина вуйлата. Марий Элын калык артисткыже Ирина Ефремован вуйлатыме «Дружба» вокальный ансамбльын да Елена Чернышеван вуйлатыме «Акварель» эстрадный ансамбльын куштымашыштым калык рӱж совым кырен вашлийын. Концертыш толшо ава-влак йочаштын мастарлыкыштым куанен онченыт.
Тиде пайремыш кум авам ӱжыныт. Икымше ӱстел коклаште Антонина Викторовна Ямбулатова Надежда ӱдыржӧ да Кира тунемшыж дене верланеныт. Антонина Викторовна Шернур район Эшполдино ялеш 8 икшыван ешеш кушкын. Оршанке педучилищым, Марпединститутым тунем пытарен. Москосо пединститутышто дефектологлан, сурдопедагоглан тунемын. Ынде 45 ий школышто пашам ышта. 19 ияш ӱдыр Оршанке педучилище деч вара Шернур районысо Удельно-Пижай тӱҥалтыш школышто директорлан да туныктышылан ышташ тӱҥалын. Ынде 43 ий Семёновка селасе школ-интернатыште соҥгыра да начарын колшо йоча- влакым туныкта.
Антонина Ямбулатова «Общего образованийын почётан пашаеҥже» знак дене палемдалтын, Пашан ветеранже. Тудо пайремыш шке шанче публикацийжым, тӱрлӧ сборникыште савыкталтше статьяжым да кидпашажым ончыктен. Тыгак экраныште тудын да лишыл еҥже-влакын фотографийыштым ончыктеныт.
Пайремыш пырля толшо тунемшыже, Кира, «Семейный торт» почеламутым сылнын лудын. Палемдыман: туныктышо садыштыже пеледышым кушта, фотоконкурслаште шке вийжым терга, алмаз дене тӱрла. Тудын лӱмеш Энелавий «Пеленак лий, авай» сылне марий мурым пӧлеклыш. Ончаш толшо-влак «Была, не была» мурым «Созвучие сердец» ансамбльын солистше Марат Лий дене пырля уло кумылын муреныт, куштеныт.
Вес ӱстел коклаште инвалид-влакын «Отражение мира» объединенийыштым вуйлатыше Инна Александровна Павлова воспитанникше-влак дене верланен. Тудын «Сердце слышит, руки делают» выставкыж дене палыме лийыныт. Инна Александровна шке шинчымашыжым эре нӧлта. Ноябрьыште ПГТУ-што «Профилактика и разрешение конфликтов в процессе социальной реабилитации людей с ментальными нарушениями» дипломым возен. А октябрьыште «Формирование инклюзивной культуры в пространстве музея» межрегиональный форумыш ушнен. Станислав эргыж дене тӱрлӧ элыште лиймышт нерген калыкым палдарышт, фотографийым ончыктышт. «Дружба» ансамбльын солистше Данила Гришаев И.Павловалан «Кленовый лист» мурым пӧлеклыш.
Кумшо ӱстел коклаште Федотовмыт еш верланен. Ешыште оҥай йӱла уло: кажне йочалан А буква гыч тӱҥалше лӱмым пуаш. Ешыште кум ӱдыр да кум эрге кушкыт: Алёна, Арина, Арсений, Алиса, Артемий, Анатолий. Нуно ваш полшен, келшен илат.
Чыла уналан пеледышым, пӧлекым кучыктеныт. «Суперстар» конкурсын участникше Геннадий Васильев ден «Молодежная волна» конкурсын участникше Владимир Королев ончаш толшо-влаклан мурым муреныт.
«Мамина профессия» сӱрет конкурсын участникше-влакымат саламлышт. Кажне сӱретчылан дипломым кучыктышт.
Тиде пайрем ончаш толшо-влаклан шуко жаплан шарнымашешышт кодеш.
Надежда Николаева.
Авторын фотожо-влак.
