Ава пелен эн пиалат лият, чон ойгат шула, кумыл кечыйолла нӧлталтеш. 26 ноябрьыште Аван кечыже палемдалтеш. Лудшына-влак авашт нерген мом ойлат?
Христина Александрова, «Ямде лий» газетын корреспондентше:
– Ава мыланна илышым пӧлеклен. Изи падырашым, кидышкыже налын, йӱдвошт шыма мурым мурен, шепкаште рӱпшен. Икымше шомакнамат ава колын, икымше ошкылнам лач тудо шекланен. Икымше йодышлан вашмутым пуэн, икымше йоҥылышнам лач тудо тӧрлен. Нелылыклан кӧра чакненна гын, суксыла арален, ончыко вӱден. Мыйынат авам, Морко район Эҥерӱмбал ял гыч Эвелина Владимировна, лач тыгай. Тудо мыланем кӧра тул-вӱд вошт эрташ ямде. Ялыш мийымем годым кажне гана порын вашлиеш, тамле деч тамле сийым ямдыла. Мый тудым моткоч йӧратем, пеҥгыде тазалыкым, кужу ӱмырым тыланем.
Галина Садовина, Оршанке район Кугунур школым вуйлатыше:
– Авам Тамара Васильевна Бусыгина Оршанке район Пуялыште ила. Тудлан кызыт – 65 ий. Поро кумылан, тыматле, ныжылге ава да кова, пеш чулым, илыш дене тӧр ошкылшо. Авам Пуял книгагудышто ятыр ий пашам ышта, ялыште пагалыме еҥ. Культур пашаште тыршымыжлан шуко гана Чап танык дене палемдалтын. 2022 ийыште тудлан «Марий Эл Республикысе тӱвыран сулло пашаеҥже» почётан лӱмым пуымо. Авамым пеш йӧратем, пагалем да тудын дене кугешнем. Чыла сайым гына тыланен кодам.
Михаил Басов, «Каче-влак» группын солистше:
– Авам Зоя Васильевна Басова кызыт сулен налме канышыште гынат, пашам ышта. Тудо Кужэҥер район Шорсола школышто ынде кумло ий наре труд урокым вӱда: ӱдыр-влакым ургаш, тӱрлаш туныкта. Тыгак библиотекарь сомылымат шукта.
Авам кок шочшым йол ӱмбак шогалтен. Ачамын илыш дене чеверласымыжлан 19 ий темын. Шочшо-влакым нӧлташ неле лийын гынат, мыланна авам тидым нигунам ончыктен огыл. Авам – моткоч поро чонан, пушкыдо кумылан, пашам йӧратыше айдеме.
Мый тудым чот йӧртем, пагалем да аклем. Тек таза да кужу ӱмыран лиеш, а ме авана дек каныш кечылан эре вашкаш тӱҥалына.