26 ноябрьыште Аван кечыже палемдалтеш. Лудшына-влак авашт нерген мом ойлат?
Лидия Музурова, IT-компаний-влакын проектыштым вуйлатыше:
– Авам – Марий Турек район Сысоево ял гыч. Йошкар-Оласе троллейбус паркыште кондукторлан пашам ышта. Полышым йодаш але чон почын мутланаш – мыланем тудо ик эн тӱҥ да лишыл еҥ. Порылык, чын верч шогымыжо, вий-куатше дене – кугу эҥертыш. Ава кечын мый тудлан тауштем.
Дина Жданова, омсам ыштыше:
– Авам Зинаида Евдокимовна Федотова Параньга район Руш Лебляк ялыште ила, кызыт тудо пенсийыште. Кум шочшан ава, ныл уныкан кова. Авам пошкудо Элпанур ялысе «Победа» колхозышто 19 ий вольыкым ӧрдыктарымаште, варажым соцпашаеҥлан 19 ий тыршен. Паша лектышыжлан шуко чапкагазым пуэныт. Калыклан полшаш кумылан, тыгак кидпашам ышташ йӧрата. Авамлан чыла сайым тыланем. Таза, пиалан лийже.
Алеся Владимирова, корреспондент:
– Авам Алевтина Васильевна Владимирова (Логинова) Морко район Кӱчыкэҥер ялыште ила. Ачам дене пырля ик эргым да кок ӱдырым ончен куштеныт. Ынде индеш уныкан кова. Тудо ура чонан, поро кумылан, сай шомакше дене кеч-молан кумылаҥден моштышо ӱдырамаш. Пашазе, чолга, эн лишыл да йӧратыме айдеме. Кеч шкежат ынде ава улам, шукертсек посна илем, ялыш авам деке миен толашак тыршем.