Полшаш ямде улат, еҥ-влак дене кутырен моштет – волонтёр толкыныш ушнаш ит ӧр! МарГУ-со Калыкле тӱвыра да тӱвыра кокласе коммуникаций институтышто 1-ше курсышто тунемше Алина Милютина волонтёр пашам вузышто идалык мучко чолган шукта.
Шуко гана сеҥен
Волжский район Усола Корамас ялеш шочын-кушшо ӱдыр чолгалыкше, писе уш-акылже дене эре ойыртемалтын. Тӱҥалтыш класслам Усола Корамас, варажым пошкудо Кугу Корамас школлаште тунемын. Кугурак класслаште шочмо литературлан чон шӱмаҥын. Марий поэт-писатель-влакын произведенийыштым куанен лудын, лончылен. Тыге 7-ше класс деч вара Алина марий литератур дене районысо олимпиадыш кошташ тӱҥалын.
– Кугу Корамас школышто олимпиадыш колташ тунемше ситен огыл. Сандене марий йылмым да литературым туныктышо Галина Егоровна Ибраева тушко мыйым ӱжын. Чонемлан сылнымут лишыл, сандене литературым ойырен налынам. Тидлан кажне гана сайын ямдылалтынам: книгам шуко лудынам, поэт ден писатель-влакын илыш корныштым шергалынам. Кажне ийын районышто я икымше, я кокымшо верла дене палемдалтынам. 11-ше классыште республикысе олимпиадыште ончыл верыш лектынам, – мане Алина Милютина.
Волонтёр толкыныш ушнен
11-ше класс деч вара Алина военный лияш але юрист профессийым ойырен налаш шонен. Но трукышто чонжо туныктышо лияш ӱжын. 2022 ийыште МарГУ-шко марий да англичан йылмылам туныктышо специальность дене шинчымашым налаш пурен.
Тыште тунемме деч посна шкем вияҥдаш тӱрлӧ йӧн уло. Алинам волонтёр паша сымыстарен. Сентябрь гыч университетысе волонтёр корпусын коллективышкыже кумылын ушнен. Тачат тудо йӧратыме, чонлан лишыл пашажым моло студент дене пырля шукта, тӱрлӧ мероприятийыш лектеш.
– Волонтёр полшаш ямде, еҥ-влак дене мутланен моштышо лийшаш. Мыланем еҥ-шамычлан полшаш, нунын дене кутыралташ пеш келша. Сандене волонтёр лияш кумылаҥым. Институтыштына тыгай пашам шуктышо ятыр ӱдыр-рвезе уло. «ВКонтакте» соцкылыште почмо беседыште икте-весе дене кылым кучена, могай мероприятий лийшаш нерген пален налына, кӧ тушко каен кертмым рашемдена.
Ик ий жапыште вузысо, республикысе шуко мероприятийыште волонтёр лийынам. Марий тӱвыра рӱдерын эртарыме У ий ёлкышто, марий ӱдырамаш-влакын «Саскавий» ушемыштын эртарыме «МУНЛО» модышыштыжо, вузышто «Почмо омса кече», «Туныктышо-влакын кечышт» да моло мероприятийыште ты пашам шуктенам, – ойла студентке.
Кучедалаш йӧрата
Алина изинек эрге йоча гай лийын. Тудо рвезе-влак дене иктӧр шоген, пырля модын. Спорт дене пеҥгыде кылым кучен. Кеҥежым писын куржталыштын гын, телым ече дене талын коштын. А эше ты ӱдыр кучедалаш пеш йӧратен. Но школышто ты мастарлыкым нӧлтен толаш йӧн лийын огыл. Сандене Алина йоча годсо шонымашыжым вузышто илышыш шыҥдараш шонен да 2022 ийыште рукопашный бойыш кошташ тӱҥалын.
– Авамын мутшо почеш, иктаҥаш изи ӱдыр-влак чыланат курчакым нумал коштыныт гын, мый эре машина да пистолет дене модынам. Тыгодым пошкудо суртышто эрге икшыве-влак гына лийыныт. Нунын дене модын куржталыштын, мый тыгай койышан кушкынам, шонем. Мӧҥгыштӧ шке семын кучедалам, тыгак отжиманийым эре ыштем ыле. Икана районысо президентский состязанийыш миен коштынам.
Вузышто рукопашный кучедалмаш мыланем келша, тыгодым нелын огеш чуч. Арнялан кум гана погынена. Шукынжо рвезе-шамыч улыт, ӱдыр-влак тушко шагалын коштыт. Боевой самбо дене кучедалаш, шкем аралаш (самообороно), икте-весым кышкылташ да моло приёмым тунемынна, – мане ӱдыр.
Тыге Алинан студент пагытше пайдалын эрта. Кечывал марте тунемеш, варажым волонтёр пашаш але театрыш миен толеш. Тыгак йолташыже-влак дене пырля уремыште кошташ йӧрата. Пытартыш жапыште ӱдыр шанче пашалан кумылаҥын. Шыжым эртаралтше ик конференцийлан пеш ямдылалтеш, М.Шкетанын «Эреҥер» романже негызеш статьям воза. Каныш годым тудо шочмо верышкыже миен толеш.