Йошкар-Ола деч кечывалвелкыла 20 меҥге тораште Шап ер уло. Тудын воктене икмыняр каныме верым келыштареныт.
Нунын кокла гыч иктыже – тазалыкым пеҥгыдемдыме «Шап» комплекс. Тудо 16 гектар кумдыкышто верланен: 10 гектарым йоча лагерь айла, а 6 гектарыште – каныме базе.
«Шап» йоча лагерь июнь гыч август марте пашам ышта. Кеҥеж жаплан тушко ешартыш 47 еҥым пашаш налыт. Кум тылзе жапыште лагерьыште йӱк-йӱан эре шергылтеш. Кум смене жапыште тӱрлӧ ийготан йоча-влак тушто канат. Смене-влакым тӱрлӧ теме почеш эртарат. Мутлан, ик сменыште спортлан шукырак жапым ойырат гын, весыште – мурен-куштымашлан.
«Шап» каныме комплекс идалык мучко пашам ышта. Санаторий семын посна пӧлем-влак улыт, тыгак пӧрт-влакымат айлен илаш лиеш. Чылаже кандаш пӧрт уло: кудытшо газ дене ырыкталтеш. Ик пӧртым кок еҥлан йӧнештарыме, весым– куд-лу еҥлан. Кажныштыже шондан, душевой кабине, кровать-влак, ӱстел, холодильник, телевизор улыт. Икманаш, пырня гыч ыштыме пу пӧртыштӧ шуко шӱдыран унагудысо гай чыла сай йӧным ыштыме. Кажне пӧрт ончылно беседкым, мангалым келыштарыме. Кеҥежым йӱштылаш, волейбол, теннис дене модаш, телым курык гыч мунчалташ, коньки дене кошташ лиеш. Тыгак йоча-влаклан площадкым ыштыме.
Эн кугу пӧрт – шым пӧлеман, 24 еҥлан малаш верым ыштыме. Тыште сӱаным, лӱмгечым да вес кугу пайремымат эртарат. 50 утла еҥан пайремат гӱжлен. Сӱанымат, шочмо кечымат эртараш йӧнан. Йодмо почеш пӧлемым тыланда келшышын сӧрастарен пуат. Мардеж пурымо деч авырыме беседкат уло. Тушко кеҥежымат мияш йӧратат.
Тыште эше монча уло. Канаш толшо-влак мончаш олташ чӱчкыдын йодыт. Крешене годым кумылан-влак поснак шукемыт. Тунам ерыште вакым ыштат, еҥ-влак йӱштылалташ толыт, а вара мончаш пурат.
Канаш толшо еҥлан чыла шотыштат йӧнан лийже манын тыршат. Кызытеш пӧртлаште кочкаш шолташ йӧн уке, но лишыл жапыште тиде йодышымат тӧрлаташ шонат.
«Комплексым тӱзатыме шотышто шуко шонымаш уло. Майыште вашталтыш-влак лийыт: бар-беседкым да тӱжвалне чыла шотыштат йӧнан туалетым ыштена. Живой уголокат лиеш.
Лагерь кумдыкышто купан да кӱкшака вер-влак улыт. Тушто гидроцикл, снегоход дене кудалышташ, а кеҥежым таҥасымашым эртараш лиеш ыле. Мутлан, ӱмаште 27-30 июньышто Юл кундем федеральный округысо спортсмен-влакын ориентирований дене соревнованийже лийын. Тугеже вер йӧнан да келшыше, – ойлыш «Шап» каныме комплекс вуйлатышын алмаштышыже Сергей Иванов.
Кеҥежым канаш толаш манын, шукын телымак заказым ыштат, а У ийлан – кеҥежым. Ончылгоч возалтше-влаклан скидкым пуат.
Кеҥеж жаплан да У ийлан ак изиш шергештеш, но канаш кумылан-влакым тиде огеш чактаре. Тӱҥ шотышто Татарстан да Чуваший гыч толшо-влак тышке толаш йӧратат.
Ак
24 еҥлан малыме веран пӧрт: ик шагатше 1000 теҥге.
5 еҥлан малыме веран пӧрт: пел кече 3000 теҥге.
10 еҥлан малыме веран пӧрт: пел кече 5000 теҥге.
Шочмо гыч изарня марте ак шулдырак.
