Кеҥеж каникул жапыште йоча шер теммешке кана. Но шуко жапым кугыеҥ деч посна эртара. А тидыже сайжак огыл: ӱдыр-рвезе-влак тазалыкыштым эмгатен, иктаж осал пашам ыштен кертыт.
Тыге ынже лий манын, Курыкмарий район Микрӓк рӱдӧ модельный тӱвыра пӧртын пашаеҥже-влак О.Максимова ден Л.Ерофеева йоча-влаклан мӧҥгыштӧ, тӱнӧ, пӱртӱсыштӧ, вӱдыштӧ шкем кузе чын кучаш кӱлмӧ нерген умылтареныт. Эн ончычак чылан пырля корно правилым ушештареныт, велосипед да ролик дене кудалыштме годым мом шотыш налаш кӱлмым лончыленыт. Общественный верыште, мӧҥгыштӧ шкет улмо годым шкем чын кучаш тунемыныт.
Библиотекарь Н.Толстова йоча-влакым пайдале каҥашым пуышо книга-влак дене палдарен. Вара йоча-влак оҥай квестыште уш-акылыштым тергеныт. Нуно чыла йодышлан чын вашмутым пуэныт да шере пӧлекым налыныт.
Йоча-влак кугыеҥын койышым ончат, садлан, ача-ава-влак, тидым шотыш налза.