Йӧратем, кунам мурызын мурымыжым колат, да капкыллан вуж-ж чучын колта. Кунам кумыл нӧлталт кая, але, мӧҥгешла, шонаш тарата. Кунам мурым колын (кеч тудо ойган лийже), илыме шуэш. А тыгай муро шочшо манын, поэт ден композитор да мурызо ик толкынышто лийшаш улыт, шонем. Кузе икте-весым йӧратыше вате-марий, кид кучалын, пырля ошкыл колтат, тыгак мурышто поэтын мутшо ден композиторын семже пырля ошкылшаш улыт. Эше мурызо нуным шке чонжо вошт колтышаш. Тунам веле муро калык чоныш миен шуэш. Таче ик тыгай мурызо дене вашлийына. Тиде Эльвира Трифонова-Канакаева.
– Эльвира, Те телым йӧратеда?
– Чынжым гын, уке. Телым мый пеш чот кылмем (воштылеш. – Авт.). Кеҥежым шочынам да ала-мо. Чын, машинаште монь кудалме годым мотор пӱртӱсым ончен каяш келша. Телым йӧратем У ий пайремлан кӧра. Кажне гана тудым йомак гай вучем. У ийым ме олаште огыл, а ялыште йолташ-шамыч дене пырля пайремлаш йӧратена.
– Те изинек мураш огыл, а домр дене шокташ тунемында. Муро аланыш корно кузе савыралын?
– Чынжымак, мый изием годым домр дене шокташ тунемынам. Вара Палантай лӱмеш музыкальный училищысе домр классым тунем лектынам. Тунамак Калинин лӱмеш тӱвыра полат пеленысе «Наигрыш» калык семӱзгар оркестрыште шоктенам. Ты коллективым вуйлатыше Александр Леонидович Федяев мурымемым колын да чӱчкыдынак оркестр почеш мураш лекташ йодеш ыле. Икымше гана Медведево тӱвыра полатыште калык ончык мурызо семын лектынам, «Верила, верю» мурым муренам.
– Тӱрлӧ сынан мурым муреда. Репертуарым кузе чумыреда?
– Кунам мый тиде муро гоч илен лекмем шижам да тудым калык дек намиен шуктем манын ойлен кертам, тунам веле тудым луктам. Репертуарыштем случайный манме муро уке. Кажныже чоныштем ала-могай историй гоч эртен каен, пуйто тудо илышыштем лийын. Эсогыл – весела мурыжат.
– Илыш шкеже мурым ойырен налаш туныкта. Тендан илышдам вашталташ таратыше тат-влак лийыныт мо?
– Илыш мылам тӱрлӧ сюрпризым ыштен: шыргыжалынат, нелынат ончалын. Ӧпкелаш нимолан, кеч-могай неле пагытыште айдеме лийын кодман. Осалым чоныш пуртыман огыл, весыланат удам шонаш ида тырше.
2000-ше ийла тӱҥалтыш мылам неле пагыт лийын. Тунам пелашем дене ойырлышна. Эргым куд ияш веле ыле. Ты жапыштак авам ден ачам арня почела илыш гыч кайышт. Лач тыге лекте: ачамын шымытше, а мылам сценыште мурыман…
УМБАКЫЖЕ 6 ЯНВАРЬЫШТЕ ЛЕКШЕ НОМЕРЫШТЕ ЛУДЫН КЕРТЫДА.
ТЫГАК ГАЗЕТЫН ЭЛЕКТРОН ВЕРСИЙЖЫМ КЕВЫТЫШТЕ НАЛЫН КЕРТЫДА.