3-9 июль – Иммунный системым аралыме кече
Иммунный системе организмым микроорганизм, микроб ден паразит-влак деч арала. Таза огыл илыш йӱлам кучымо (аракам йӱмаш, тамакым шупшмаш, начар тарванылмаш), стресс ден депрессий, нойымаш, начарын малымаш, йырым-йырысе уда среда, таза огыл кочкыш иммунитетым луштарат.
Йырым-йырысе средан факторжо-влаклан (аллерген-шамычлан) организмын шижмашыже утыждене пӱсештмым аллергий маныт.
Кеҥежым тӱрлӧ кушкыл пеледмылан кӧра аллергий ик-кок арня лийын, тыгак уло тургым мучко (аллерген семын икмыняр тӱрлӧ кушкыл лиеш гын) шуйнен кертеш. Шукш-копшаҥге пурлмыланат южгунам аллергий тӱҥалеш. Аллергик-шамычлан пачемыш, ошымшӱлыш, мӱкш-влак поснак лӱдыкшӧ улыт. Шокшо да кукшо игече годым южышто тӱрло лӱдыкшӧ химический соединений-влак погынат, нунат аллергий тӱҥалаш амалым ыштен кертыт. Кеҥеж – свежа фруктым кочмо пагыт, саскам утыждене кочмыланат южгунам аллергий тӱҥалеш.
Аллергийын симптомжо-влак:
– нер ок шӱлӧ, кокырыкта;
– нер гыч тазыла йога;
– нерыште да логарыште лӱгыштыкта;
– шинчавӱд йога, шинча йошкарга;
– тӱрвӧ, шинчакомдыш пуалыт.
Аллергийын симптомжо-влак палдырнаш тӱҥалыныт гын, врач дек кайыман да лӱмын тест-влак да вӱр анализ полшымо дене аллергеным пален налман.