Орвам телым, терым кеҥежым ямдылыман. Тыге калык ойла. Чынак, кеҥежым сайын пашам ыштен, теле ласкан эрта. Лудшына-влакынат пашашт шолеш…
Лариса ПЕТРОВА, Морко район, Нӧрепсола:
— Ушкалым теле гоч ончен лукташ кургым ситышын шапашленна. Ончычсо семын шудым солаш лу меҥге ӧрдыжкӧ кайышаш уке: пӧрт воктенак трактор да бензосава дене солена, овартена.
Ешыштына шӧрым йӧратена. Уныкана-влак торык шарикым, сырникым йӧратат. Шӧрым, торыкым йодын толшо-влаклан ужалем, кажне кечын налше улыт. Кеҥежым мӧр, модо дене йогуртым ыштен кочкына.
Анастасия АПАЕВА, Пошкырт кундем, Уфа:
— Тений снеге пеш шуко. Снегым ялна деч тора огыл кугу олыкышто погенна. Кок гана мийымаште индеш литр погыныш. Тамле вареньым ыштен кочна. Икшыве-влаклан, кеҥежым шарналтен, куанен кочкашышт телылан кылмыктышна.
Марианна ИШПАХТИНА, Пошкырт кундем, Бирск:
— Бирскыште илена. Кеҥежлан Мишкан районысо Нерге ялыш толына. Снегым шуко погенна. Холодильникыш кылмыкташ оптенна, утыжым ужаленна. Ялна поҥгылан, емыжлан поян. Поҥгылан кошташ эше ондак. Курыкышто, пасушто мӧрым шуко погена. Кажне ийын кум литран 60 банке компотым шолтем. Кызыт шоптыр ассорти, вишне, эҥыж компотым ямдылем. Эҥыжшым шоптыр коклашкат оптем — тамле лиеш. Компотым куштылго шолташ: 3 литран банкылан – ик стакан гыч мӧр ден сакырложаш да шолшо вӱд.
Мончаш пураш 15 мужыр куэ выньыкым пидынна. Пакчаште шӱкым кӱрде да вӱдым оптыде, нигузе ок лий.
Валентина СЕМЁНОВА.