Ондак кеҥеж могайрак лийын? Тений кеҥеж шокшо дене куандара мо? Тидын дене Йошкар-Олаште илыше да ятыр ий игечым эскерыше Геннадий Иванович Рыбаков палдара:
– Пытартыш 100 ийыште кеҥеж 0,9 градуслан шокшемден. Пытартыш 40 ийыште кеҥежым кокла шот дене 18,1 градус шокшо шога. 2000-2009 ийлаште юж кокла шот дене 17,9 градус марте ырен гын, 2010-2020 ийлаште – 20,3 градус марте. 2010 ийыште поснак шокшо лийын. А 1992 ий кеҥежым юалге игече шоген.
Пытартыш 30 ийысе жапым ончалаш гын, кеҥежын икымше пелыштыже 14 гана шокшырак лийын, а кокымшо пелыштыже –16 гана. Кокымшо пеле икымше пеле деч 0,5 градуслан левырак. 1900-1960 ийлаште чот шокшо кеҥеж кок пачаш шуэнрак лийын, а юалге кеҥеж чӱчкыдынрак шоген. Пытартыш 40 ийыште чот шокшо кеҥеж ныл гана лийын, пытартыш гана – 2019 ийыште.
Юж чот ырен: 34 градус шокшо марте – 1982, 2000, 2009, 2016, 2020 ийлаште, 35 градус марте – 2002, 2007, 2011 ийлаште, 38 градус марте – 1991, 2010 ийлаште. А южгунам, мӧҥгешла, 0 градус мартеат йӱкшемден: 1996 ийыште, +1 марте 2003, 2018 ийлаште.
Тений кеҥеж шокшо лийшаш, но тӱҥалтыште моло ийласе деч юалгырак да йӱран лийын кертеш. Июнь мучаште да июль тӱҥалтыште кече поснак чот ырыкта. Йӱрым ситышын вучыман.