Йошкар-Олаште илыше да ятыр ий игечым эскерыше Геннадий Рыбаков палдара:
– Пытартыш 32 ийыште Йошкар-Олаште майыште юж кокла шот дене 12,7 градус марте ырен, тений – 8 градус марте гына. Пытартыш гана тыгай юалге май 1999 да 2000 ийлаште лийын. А тыгай йӱштӧ шошым 1999 ий годсек ужалтын огыл. Теле тений, мӧҥгешла, 2 градуслан левырак лийын.
Пытартыш 30 ийыште йӱштӧ шошо деч вара шокшо кеҥеж куд гана веле толын, а юалге кеҥеж – кандаш гана. Йӱштӧ май деч вара шокшо кеҥеж ныл гана куандарен, куд гана юалге лийын. Теният кеҥеж пеш шокшо лийшаш огыл.
Южо ийлаште (1983, 1984, 2007) май тӱҥалтыштак юж 30 градус марте ырен, а май мучаште (2007, 2015 ийлаште) – 31-33 градус марте.
Тений майын кокымшо пелыже май тӱҥалтыш дечат юалгырак лийын. Йӱр шуко йӱрын, лум кум гана лумын. Пытартыш 35 ийыште йӱран майже вич гана веле лийын, а лум индеш гана лумын.
Пытартыш 23 ийыште июньышто кокла шот дене 17,4 градус шокшо шоген. Юалге индеш гана лийын, кок гана – йӱштыракат. 1982 ийыште поснак йӱштӧ (11,3 градус гына) шоген. А шокшыж дене июнь кандаш гана куандарен, ныл ганаже чотак шокшо лийын. Ӱмаште поснак шокшо ыле.
Тений июньышто утларакше ояр игече шогышаш, йӱр шагал лийшаш. Кокла шот дене юж 17,7 градус марте ыра гын, июльышто але августышто изиш шокшырак лийшаш.