Тений кеҥежын мо дене ойыртемалтмыже да шыже могай лийшаш нерген игечым ятыр ий эскерыше Геннадий Рыбаков палдара:
– Тений май тылзат молгунамсе деч ойыртемалтын. Пытартыш 30 ийыште эскерыме деч 4,6 градуслан йӱштырак шоген. 22, 24 майыште лумат лумын. Ты кумылымак умбакыже июнь шуен. Кокла шот дене 16,5 градус шокшо гына лийын, пытартыш 30 ийыште 17,2 градус шокшо шоген. Но тенийысе июнь дечат йӱштырак лиеден. Июнь-июльышто йӱр утларак йӱрын. А августышто – кок гана гына, тидыже нормо деч вич пачаш шагал. А кӱдырчан йӱр кажне ийын шукемеш.
Июльышто кокла температур молгунамсе гаяк лийын. А август чот ӧрыктарен: икымше пелыште 2,7 градуслан, а кокымшо пелыште 2,5 градуслан шокшырак шоген. Августышто игече июль дечат 1,4 градуслан шокшырак лийын.
Кумло ий эскерыме почеш, тений июньышто 0,7 градуслан юалгырак, июльышто 0,1 градуслан, а августышто 3,8 градуслан шокшырак лийын. А уло кеҥеж 1 градуслан шокшырак шоген.
Тений сентябрьыште молгунамсе деч 0,4 градуслан юалгырак лийын кертеш. Шыже мучко йӱштӧ лийшаш огыл, кокла шот дене – 0 градус. Телымат утыжым йӱштым вучыман огыл.