Российыште «Безопасность детства» акций тӱҥалын.
Акций годым йоча-влакын лӱдыкшыдымылыкыштлан кугу тӱткыш ойыралтеш, тидын шотышто полицейский-влак инструктажым эртарат, школышто тунемше ӱдыр-рвезе-шамычлан да нунын ача-аваштлан ой-каҥашан листовкым пуэдат.
Тушто транспортышто, вӱдыштӧ, мӧҥгыштӧ, йоча да спорт площадкылаште шкем кузе кучымо нерген умылтарен возымо. Кастене да йӱдым ийготыш шудымо ӱдыр-рвезе-влак законло представительышт деч посна коштшаш огытыл, акций кышкарыште тидын шотыштат умылтарат.
Йочам ыштенат гын, тудым ончыман
Южгунам ача-ава але йочан законло представительже ийготыш шудымо икшывыжым шот дене ончен куштымаште, туныктымаште шке обязанностьшым кӱлеш семын ок шукто але йӧршеш тидым ок ыште. Але, мутлан, тыгай ача-аван уда койышыжым ончен, йоча-влакат тидлан тунемыт. Тыгай кугыеҥ-влак денат полицейский-шамыч профилактике пашам виктарен шогат.
2023 ий тӱҥалтыште гына Марий Элыште ийготыш шудымо-влак дене паша шотышто подразделенийын учётышкыжо 230 тыгай ача-авам шогалтыме. А кызыт 800 ача-ава профилактический учётышто шога.
Ача-ава але законло представительын йочам ончен куштымо да воспитатлыме годым шке обязанностьыштым кӱлдымын шуктымылан республикыштына административный правам пудыртымо 1365 случайым палемдыме.
Ийготыш шудымо-влакын погынымо, уда условийыште илыме ешлаш полиций пашаеҥ-влак 783 гана рейдыш лектыныт. Тергымаш деч вара 1642 еҥым административно мут кучаш шогалтыме.
Осал пашам шагалемдаш манын
Ийготыш шудымо-влак коклаште преступленийым шагалемдыме амал дене Марий Элыште интерактивный картым ямдылыме.
Тушто йоча-влаклан лӱдыкшым кондышо вер-влакым палемдыме. Ты картым Йочан праваж шотышто Марий Эл Республикысе уполномоченныйын https://mari-el.gov.ru/republic-state-bodies/rfdeti/dangerous-places/#close официальный сайтыштыже вераҥдыме. Ты сайтыш компьютер але телефон гоч пурен, кӱлеш муниципальный образованийым ойырен налаш да лӱдыкшӧ вер-влак спискым ончалаш лиеш.
«Шокшо линий» полша
Йочан праваж шотышто Марий Элысе уполномоченныйын аппаратыштыже тыгак «Безопасность детства» шокшо линий телефон пашам ышта.
(8362) 64-17-34 номеран телефон дене (кажне паша кечын 9 гыч 17 шагат марте) йыҥгыртен, ийготыш шудымо-влакын илышышт да тазалыкыштлан лӱдыкшӧ лийме случай-влак нерген увертараш лиеш.
Лӱдыкшым шочыктышо объект-влак нерген уверым up_prr@gov.mari.ru адресан электрон почтыш колтен кертыда.
А.В.АФАНАСЬЕВА, Марий Элысе МВД-н полиций участковый уполномоченный да ийготыш шудымо-влак дене паша шотышто отдел вуйлатышын алмаштышыже, полиций подполковник:
– Кеҥежым йоча-влакын яра жапышт ятыр. Тыгодым иктаж-могай лӱдыкшӧ ситуацийыш логалын кертме амалат шукемеш. Садлан ача-ава-влаклан шке икшывыштлан лӱдыкшыдымылык правил нерген эре ушештарыман.
А икшыве-влаклан ача-аваштын телефоныштым веле огыл, экстренный службо телефон номерым палыман.
– Велосипед але самокат дене кудалыштме годым корно правилым шуктымо нерген ида мондо.
– Шке илыме райондам сайын палыза.
– Ӱдыр-рвезе-влаклан палыдыме еҥ дене кутырыман, тыгай еҥын автомашинашкыже шичман огыл.
– Шке таҥаш подростко-влак иктаж-могай лӱдыкшӧ модышыш ушнаш ӱжыт гын, «огым» манаш тунемза.
– Икшыве кугыеҥ деч посна йӱштылаш кайышаш огыл.
– Ача-ава, шырпе дене модмо азап марте шуктен кертеш манын, йочалан умылтарышаш улыт.
– Шокшо игече годым пачерлаште окна-влакым почына, тыгай годым йочам эре шекланен шогыман. Окна воктеч пӱкеным але моло пӧртарверым кораҥдыман – тыге йоча окна ончык кӱзен ок керт. Окнаш вераҥдыме москитный сетке дене йоча ондалалт кертеш: сетке пеҥгыдын вераҥдыме манын, йоча сеткыш эҥерта да ӱлык шуҥгалтеш. Азап деч утлаш манын, окналаш лӱмын блокаторым але сравоч дене тӱкылыман окна кылым вераҥдаш йӧнан.
Йоча ача-авам ончен тунемеш, садлан шке икшывыланда пример лийза.
Авторын да интернет гыч налме фото-влак.