Кажне вашлиймаш шерге

2020 ийыште Кугу Отечественый сарыште сеҥымылан 75 ий темеш. Элна кажне геройым аклен шарна. Ий-влак эртат, шучко жапым шке шинча дене ужшо еҥ-влакат шагалемыт. Кызытсе самырык тукым сарым илен лекше-шамычын кугезе уныкашт улыт. Садлан ветеран-влак дене кажне вашлиймаш моткочак шерге.

3 мартыште В.Колумб лӱмеш республикысе йоча да самырык-влаклан книгагудышто «Ӱдырамаш чуриян огыл сар» лӱман вашлиймаш лийын. Тушко ветеран ден оласе студент-влак погыненыт. Сарын участникше ден тылын ветеранже-влак сар жапым шарналтен, у тукымлан неле пагытым кузе илен лекмышт нерген  каласкаленыт.