Светлана Архипова, Россий Писатель ушемын Марий Элысе пӧлкажым вуйлатыше:
– Колумб лудмаш – сылнымутым йырвел тӱняш шарыме да аклыме пайрем. Кызыт тудо регион-влак кокласе фестиваль-конкурс маналтеш. Да, чынак, конкурсыш Татарстан кундем гыч сылнымутым йӧратыше йоча ден кугыеҥ-влак ынде икмыняр ий почела ушнат.
Мыланем Арск районысо Шурабаш школышто шинчымашым погышо кок участникын почеламутым устан лудмышт келшыш. Виолетта Анисимова мотор марий вургемым чиен, Валентин Колумбын «Муро» почеламутшым йоҥгалтарымыж дене чылаштым куандарыш. Адель Антипов «Шочмо йылме» почеламут дене сеҥыше радамыш лекте. А вараракше Чавайнур ялыште пайрем лӱмеш нӧлтымӧ сценыште татар такмак-влакым шергылтарыш, калык тудлан рӱж совым кырыш. Адель сайын мура, кушта да шочмо йылмыжлан шӱмаҥын, татар йылмымат пала.
Вигак, коеш, Шурабаш школышто йоча-влак шочмо йылмым тунемыт. Туныктышо ден воспитатель-влак, ача-ава йоча-влак дене тыршен пашам ыштеныт, почеламутым усталыкыштым аклен, ойырен налыныт. Южо изи икшыве кужу почеламутым тунемын, ӧрат веле, куд ияш-влакат сценыште тукныде кужун ойлен кертыныт. Мутлан, 1-ше номеран Морко йочасад гыч Алёна Александрова Колумбын «Йоча ден кече» почеламутым ойырен. Каласкалымыж дене ончышо калыкын чонжым савырен керте, икымше вер дене палемдалте. Алёнан воспитательже, Инна Валерияновна Алексеева, кажне ийын йоча-влакым ямдылен конда. Тудо могай вий-куатан еҥ – тыгай-влаклан эре тауштыман. Тек ты сылнымут пайрем умбакыжат ила, шочмо йылмынам арален кодымаште чапле пашам шукта.