«Автор» номинацийыш ушнышо радам денат кугешнаш веле кодеш. Морко район Шордӱр школын туныктышыжо И.А.Михайлова «Ош халатан кӱслезе» почеламутшо дене куандарыш: почеламутым каласкала, кӱсле дене лукмо «кылтинг-кылтинг кӱслеже, Морко ӱдырын парняже» манме шомаклам яндар йӱкшӧ дене муралтен колта. А тунемшыже М.Бирюкова 2-шо верым нале.
«Ты почеламутым тений майыште Кужэҥер эмлымверысе врач-терапевт, Морко районын ӱдыржӧ Алиса Ельсукова лӱмеш возенам. Тунам кечывал стационарышке коштмо годым палатыш кӱслем конден шоктыш. Вот, шонем, могай терапевт! Куанымем дене почеламут шочо. Тылеч ончыч тыгайже шагалрак лийын, южгунам йоча-влакын возымыштым келыштарашыже полшенам ыле», – каласкалыш Ирина Александровна.
«Алиса Владимировна, те кертыда!
Моткочак мастарын шоктен моштеда!
Айфон дечын ӱдыр шинчам кораҥдале –
Кӱслезым, сай врачым, кугешненак ончале!»
