2021 ий гыч элыштына Россий Федераций тӱвыра министерствын «Музейные маршруты России» проектше шыҥдаралтеш.
Тений тудо элнан 12 регионжым авалтен: Моско, Краснодар областьлам, Башкортостан Республикым, Санкт-Петербургым да молымат. 14-15 июльышто мероприятий-влак Йошкар-Олаште эртеныт.
Форумын эн тӱҥ ужашыже – презентаций да экспертно-методический мероприятий – Э.Сапаев лӱмеш Марий кугыжаныш опер да балет театрыште лийын.
Тудым Марий Эл Правительстве Председательын икымше алмаштышыже М.З.Васютин почын, тоштер паша эре воранен толжо манын тыланен. Погынымаштак тудо тӱвыра министрын алмаштышыже Елена Бурнашевалан «За заслуги перед Марий Эл» орденын медальжым кучыктыш.
Марий Элын тӱвыра министрже К.А.Иванов республикын музей календарьжын эн тӱҥ событийже-влак дене палдарыш. Тудо Йошкар-Ола, Волжск, Козьмодемьянск олаласе тоштер-влакым уэмдыме, кӧргӧ туризм вияҥ шогымо нерген уна-влаклан презентацийым ончыктыш.
Тыгак шке шомакшым Россий тӱвыра министерстве пелен улшо тоштер да внешний кыл шотышто департаментын вуйлатышыже Е.М.Харламова каласыш. Тудо палемдыш: «Марий Элыште кажне муниципалитетыште тоштер уло. Ик регионыштат тыгайым ужын омыл».
Умбакыже тӱрлӧ ола гыч музей пашаеҥ-влаклан шомак пуалтын. Российысе историй да этнографий тоштерын вуйлатышы-
же И.В.Жукова Бородинский кредалмашын историйжым ончыкташ лӱмын ыштыме представлений нерген каласкалыш. Вургем, событий, декораций – чыла ик верыш чумырымо.
Марий Элыште турист-влакын ик эн йӧратыме верышт – Шереметев замок. Тудын кызытсе илышыж дене вуйлатыше Д.В.Немцев палдарыш. Моло уна тыгак музей пашаште кучылтмо у йӧн, экспонат, эртарыме проект, фестиваль нерген ойлышт.
Кажне кечын тӱҥ мероприятий деч вара уна-влаклан оҥай программе эртаралте: Йошкар-Ола мучко экскурсий, орган да кӱсле дене шоктымо концерт. Тыгай проект-влак умбакыжат вияҥыт, калыкым тоштерлаш кошташ, тӱвыра деке шӱмаҥдаш тӱҥалыт манын ӱшанена.
Ирина ШИБАНАЕВА.