8 апрельыште Е.И.Чемоданован вуйлатымыж почеш «Талешкын пелашыже. Талешкын аваже» патриотический фотопроектын кокымшо съёмкыжо эртаралтын.
Участник-влак ешаралтыныт. Талешке-влакын аваштлан да пелашыштлан фотографын объективше ончыко шогалаш куштылго огыл. Кажне ӱдырамаш шке чоныштыжо тургыжланымашым, йӧсланымашым, илыш историйым нумалеш, шинчашт шинчавӱд дене темын. Но эргыштын да марийыштын кительыштым кидыш налын, нуно кугешнымашым шижыт. Тиде шижмаш умбакыже илашышт вийым пуа.
Мый Елена Ивановна дене вашлийым да тудын деч ты проектым ыштыме годым могай нелылык лекме нерген йодым. Тудо вашештыш:
– Нелылык лийын огыл, молан манаш гын республикысе Правительствына тиде шонымашым вияҥдаш полша. Студийым пӱтынек тудо организоватлен.
– Те соцсетьыште возенда, пуйто проектым выставке дене мучашледа. Кузе да кушто ме тудым ужын сеҥена?
– Чынжымак, проектым выставке дене мучашлена. Тудо кумшо съёмко деч вара лиеш. Чыла фотом да серышым ямдылымек, ме нуным «ВКонтакте» соцсетьыште шкенан «Талешкын пелашыже. Талешкын аваже. Марий Эл» сообществышкына луктына.
Мыят тиде проектын кузе эртаралтмыжым эскеренам. Герой-влакын авашт да пелашышт дене мутланенам. Морко кундем Кокласола ял гыч Алевтина Дмитриевна Петрова (фотошто) тыгерак каласкалыш:
– Эргым, старший лейтенант Дмитрий Анатольевич Петров, нерген шарнымашым арален кодаш манын, тиде проектыш ушненам. Тудо Москосо высший командный училищым тунем пытарен. Умбакыже службым шуяш Ленинград область Выборг районысо Каменка посёлкыш колтеныт. Воинский частьыште Дима шкенжым сай могырым ончыктен, сандене тудлан пеш вашке старший лейтенант званийым пуэныт да ротын командиржылан шогалтеныт.
Февраль кыдалне, мемнам ойгандараш огыл манын, ученийыш каена манын ойлен. 24 февральыште тушманын территорийышкыже пуреныт. Дима кок кугу тул гыч ротыжым луктын кертын, а кумшылан тушманын вийже кок-кум пачаш кугурак лийын. Садлан тиде кредалмаште эргым да тудын алмаштышыже Олег Геннадьевич Сорокин (Татарстан Республикысе Мамадыш ола гыч), йолташыштым утараш манын, тул йымак пуреныт. Тыге нуно кокшӱдӧ еҥын илышыжым утареныт.
– Тиде проект нерген кузе пален налында?
– Проект нерген Людмила Крылова деч пален налынам. Тудынат эргыже элнам арален. Люда «ВКонтакте» соцсетьыште улшо «Талешкын пелашыже. Талешкын аваже. Марий Эл» сообществе нерген каласкален. Шкежат тиде сообществыш ушнен да мыйымат кумылаҥден. Группыш ушнымек, Елена Ивановна дене лишкырак палыме лийынам да проектыш толаш шонен пыштенам. Эргымын военный вургемжым пеленем конденам.
Студийыште алал атмосфере ден поро, ӱшанле шомак-влак ӱдырамаш-шамычлан тӱҥалме пашаштым мучаш марте шукташ полшат. Участник-влаклан «Талешкын пелашыже. Талешкын аваже. Марий Эл» проект моткоч келшен. Нуно Ю.В.Зайцевлан полшымыжлан уло кумылын тауштат. Проектын фотографше — А.Котляров.
Дарья Быкова.