Российыште 1988 ий годсек кажне ийын мартын кумшо рушарнян Быт обслуживаний ден жилищно-коммунальный озанлык пашаеҥ-влакын кечышт палемдалтеш. Тений тудо 15 мартыште лиеш. Тиде амал дене Йошкар-Оласе сервис технологий техникумышко миенна. Тыште калыкым социально обслуживатлыше специалист-влакым ямдылат.
«2019 ий 31 декабрьыште «Парикмахерское искусство» компетенций дене аттестацийым эртенна. Тидыже мемнан техникумышто WORLDSKILLS RUSSIA чемпионатын регионысо этапшын икмыняр стандартше дене таҥасымаш-влакым эртараш йӧным ышта. Парикмахерский мастерскойым уэмдаш, обслуживатлыме верым саемдаш, вентиляцийым шындаш 600 тӱжем теҥге наре окса каен. Ме калыкым социально-бытовой обслуживатлыше кадрым ямдылена. Нацпроект дене келшышын, кум ияш марте йоча дене шинчыше ава-влакым да витле ияш деч кугурак ийготан-влакым парикмахерлан, закройщиклан, портнойлан да ургызылан оксам тӱлыде туныктена. Тыште ешартыш профобразованийым налше-влак деч молыжо чылан яра тунемыт. Техникумышто 312 тунемше очно, 516 еҥ заочно тунемеш. Тыгак 7-9 –ше класслаште тунемше-влакым парикмахерлан да няньылан туныктена. Арнялан кум гана занятий эртаралтеш, ик ий тунеммек, профессийым налме нерген свидетельствым кучыктена. У тунемме ийлан приёмный коммисий июньышто пашам ышташ тӱҥалеш да 15 августышто тунемаш пурышо-влакым налме нерген приказ лектеш», – каласкалыш техникумын директоржо Елена Юрьевна Валькова.
Ӱпым пунена
Таче ты техникумышто тунемше да пашам ыштыше самырык ӱдыр-влак дене палыме лийына.
Ася Токпулатова президентский школ-интернатыште вич ий художниклан тунемын, вара Йошкар-Оласе художественный училищыште «Дизайн по отраслям» специальность дене шинчымашым налын. Ӱмаште сентябрьыште тышке парикмахерлан тунемаш пурен. «Кызыт прическо искусство профиль дене практике кая. Ме ӱпым тӱрлӧ семын пунаш тунемына. «Модный образ» республикысе конкурсышто участвоватленам, прическым, костюмым ямдыленам. Сертификатым да пӧлекым пуэныт. Ӱп дене пашам ышташ мылам келша, апрельыште производственный практикыш каена», – мане тудо.
Тыште икияш курсым тунем лекмеке, Ася дизайн, архитектур да художественный направлений ден вузыш тунемаш пураш ямдылалтеш. «Санкт-Петербургыш каяш кумылем уло, но мый шке ешем, палымем-влакым коден тыгай торашке каяш ямде омыл, садлан Йошкар-Олаште ПГТУ-ш але МарГУ-ш тунемаш пурынем», – каласыш 21 ияш самырык еҥ.
Тудо изинек сӱретлаш йӧратен. Вашешыже шинчат гын, тыманмеш портрететым сӱретлен пуа. Картине-влак мӧҥгысӧ пырдыжшымат сӧрастарат.
Ургаш йӧрата
Елена Медведева Йошкар-Олашке Киров кундем гыч илаш толын. Ондак техникумышто ургызылан тунемын, ынде тыштак, Ресурс рӱдерыште, угызылан пашам ышта. «Кажне кечын йодмо почеш могай-гынат вургемым ургена. Вашке техникум ярмиҥгаш шке сатужым луктеш, тушто ургымо чиемна: жилет, халат, йымал тувыр да молат – лийыт. Тыгак марий тӱрым кучылтын, сатум ыштена. Марий калыкын Погынжылан марий орнаментан 500 сумкам ургенна. Инвалид-влакын спартакиадыштлан жилетым ыштенна, кызыт ик руш ансамбльлан костюмым ургена. Урген шинчымем годым чонем кана. Шке пашамым йӧратем», – ойла Елена.
Техникумышто мастер
Кристина Тихомирова техникумышто туныкта, тыгак производственный практикым эртарыше мастерын сомылжым шукта. 2017 ийыште шкежат тыште ургызын да дизайнерын профессийжым налын. Тыршен тунеммыжым шотыш налын, пашашке коденыт. Тунеммыж годым WORLDSKILLS RUSSIA чемпионатыште вийжым терген да шке компетенцийыште икымше верым налын. Вара Российысе чемпионатыште участвоватлен, 11-ше верыш лектын. «Ӱдыр-влаклан калыкым быт да социально обслуживатлыше сферыште пашам ышташ темлем. Вет илышыште тыште тунемме кӱлешан да йодмашан пашалан шотлалтеш. Чылан мотор лийнешт, сайын чийынешт, шке шонымыштым ыштыктынешт, а ме полшена. Кызыт «Йошкин кот» кевыт кӧргым, витриным сӧрастараш модыш пырыс-влакым ургена. Практикышке коштшо 15 ӱдыр шке эскизшым ямдылен. Кажнын шке шонымашыже почылтеш, тыгак интерьер дизайным ышташ проектым возена», — ойла туныктышо Кристина Владимировна.