Марий эстрадыште кӧргӧ вий-куатан, виян йӱкан да илышыште пеҥгыдын шогышо, уста еҥ. Тиде – Марий Элын сулло артисткыже, Олык Ипай лӱмеш кугыжаныш премийын лауреатше Эльвира Попова. Мурыжо-влак дене калык чоным 24 ий куандара, илыш нерген шонаш тарата.
Икымше ошкыл
Шернур район Шӱдымарий ял ӱдыр йоча годсек мураш йӧрата. Поснак ачаж велым сайын мурышо, семӱзгар дене шоктен моштышо-влак лийыныт.
Ончыкылык профессийым усталык паша дене кылдаш шонен, 1997 ийыште И.С.Палантай лӱмеш тӱвыра да сымыктыш колледжыш эстраде пӧлкашке тунемаш пурен. Кокымшо курсышто тунемыж годым икымше гана кугу сценышке лектын.
– Тунам Марий кугыжаныш филармонийын эртарыме «Марий шыже» фестивалыште шкем терген онченам. Тиддеч вара тӱрлӧ конкурсышко чӱчкыдын ушненам, лауреат лийынам. Кугу сценышке лекташ мыланем республикысе «Ший памаш» финн-угор эстраде, «Эстрадный вернисаж», фестиваль-конкурс-влак кугун полшеныт. Чыла тидыже эшеат шкем вияҥдаш таратен, азарт манмет лектын. Могай-гынат кӱкшытыш шуаш тыршыме.
Мый профессиональный мурызо-влак Зоя Берникова, Раисия Данилова, Василий Павлов, Станислав Шакиров, Геннадий Петухов, Иван Смирнов, Августа Романова, Татьяна Денисова да моло дене пашам ыштенам. Туныктен ойлымыштым, южгунамже шылтален каласымыштым эре шотыш налынна, – мане Э.Попова.
Филармонийыште
Дипломым налмеке, Эльвира Йошкар-Оласе Марий кугыжаныш филармонийыште тыршаш тӱҥалын. Усталык паша тыште «шолын», шкем вияҥден толаш йӧн лийын. Гастрольышко чӱчкыдын лектын коштыныт. Тыште пырля тунемме рвезе, мурызо Влад Николаев дене пашам ыштен. Кок уста еҥын паша лектышыже куандарен, шагал огыл дуэт шочын.
– Икымше дуэтна – «Лачак тые веле» муро – кокымшо курсышто тунемме годымак лектын. Туддеч вара «Молан от тол», «Шупшалалтме там» да моло муро-влак возалтыныт. Чыла тидлан семым Влад Николаев келыштарен. Тачат мый нине муро-влакым йӧратен мурем. Влад Николаев дене пырля пашам ыштыме жапым (1998 ий гыч 2007 ийла) творческий карьерыштем шӧртньӧ пагытлан шотлем. Тунам самырык, чолга лийынна, чыла вере шуаш тыршенна. А муро-влак романтизм шӱлышан лийыныт, – ойла мурызо.
Эльвира тӱнямбалсе «Дельфийские игры» фестиваль-конкурсышто, Российысе «Красная гвоздика» конкурсышко ушнен, палыме мурызо-влак дене ик сценыште мурен ончен.
Усталыкше волгалтын
2008 ийыште Э.Попова шке семынже мураш тӱҥалын. Пелашыже, Марий филармонийын ончычсо звукорежиссёржо Владимир Кудрявцев, дене пырля еш бизнесым вораҥдарен толыныт. Тидлан кӱлеш аппаратурым налыныт, командым погеныт. Гастроль дене Пошкырт, Удмурт, Татарстан, Урал, Ханты-Мансийск да марий-влакын тӱшкан илыме моло кундемыште лийыныт. Чаманен каласыман, 2018 ийыште пелашыже илыш дене чеверласен.
2013 ийыште мурызо МарГУ-што режиссёр пӧлкам тунем лектын. Тудо мурын качествыж верч чот тырша. Мурын шонымашыжым вургем, ыштыме макияж, причёско, сем, аранжировко пӱтынек почын пуышаш улыт, манеш.
– Чылажат ик тичмаш лийшаш. Мыйын кажне муро – тиде мыйын илыш-корнем, чон йӧсем, чытен лекме нелылыкем. Ончышо-влаклан каласышаш шомакем погына гын, нунылан муро-влакем гоч чонем почам, –ойла мурызо.
Фольклор коллективым вуйлата
2018 ий годсек Эльвира Попова Оршанке посёлкысӧ тӱвыра да каныме пӧрт пеленысе «Ошла сем» калык фольклор ансамбльым вуйлата. Коллективыште визытын мурат. Репертуарыштышт калык, эстраде муро-влак улыт. Кодшо ий шыжым коллектив «Ший памаш» эстраде муро фестиваль-конкурсышто кумшо вер дене палемдалтын.
– Влад Николаев дене угыч пырля пашам ышташ тӱҥалынна. Тудо кызыт «Ошла сем» ансамбльыште аккомпаниатор. Шукерте огыл «Кондо шокшым» у мурылан семым возен.
Коронавируслан кӧра ме онлай пашам ышташ тунем шуынна. Кажне кечын репетицийым эртарена. Ончыкылыклан шонымаш ятыр. Репертуарым пойдарыман, костюмым шкан веле огыл, тыгак коллективлан ургаш кӱлеш, – мане Э.Попова.
Яра жапыште
Эльвира Попова яра жапшым, поснак шошым, кеҥежым Йошкар-Ола тӱрыштӧ верланыше дачыште эртара. Участкыже чодыра, эҥер воктене верланен, тушто вий-куатым, чон-ласкалыкым налеш, уто-сите шонымаш деч кораҥеш.
Эльвиран ӱшанле эҥертышыже, пиалже – 16 ияш Валерия ӱдыржӧ. Кызыт тудо Йошкар-Оласе кугыжаныш да муниципальный службо колледжыште тунемеш.
Эльвира Поповалан сеҥымашым, тӱвыргӧ паша лектышым тыланена да ончыкыжымат у муро-влакым вучена.