Mozilla IT-компаний Common Voice краудсорсинг проектым шонен луктын. У проект йӱк шаблон-влакым ик верыш чумыра.
Проект волонтёр-влакын полшымышт дене илана. Нуно тӱрлӧ предложений-влакым (ойлончым) микрофон дене войзат да весе-влакын возымо йӱкыштым колыштыт. Кызыт проектын базыштыже 76 йылме: белорусс, армян, казах, баса, урду, гуарани, башкир — да молат. Чылажге 13000 шагат йӱкым войзымо. Эн шуко йӱкым англичан, руанде да немыч йылме-влак дене войзымо.
Проектын йӱк базышкыже марий йылмат ешаралтшаш. Тидлан марий лингвопрограммист, йылме активист Андрей Чемышев вуйын шога да марий йылмым палыше-валакым «Кажне марий деч 100 йӱкаҥдыме ойлончо!» проектыш ушнаш ӱжеш.
Тиде пашам вораҥден колташ, тудо ВКонтакте «Йӱк технологий» https://vk.com/mari_voice тӱшкам почын. Тушто у понятийлан тыгай умылымашым пуа: «Common Voice — тиде машине-влакым чын еҥын ойлымо гай ойлаш туныкташ полшаш ыштыме тӱҥалмаш».
Common Voice йӱк данный базым марий предложений-влак дене кажне кумылаҥше пойдарен кертеш.
Тидлан ссылке почеш https://commonvoice.mozilla.org/mhr регистрацийым эртыман, микрофон сӱретым темдалаш да предложенийым йӱкын лудаш кӱлеш.