Специальный военный операцийыште Шочмо элна верч шогышо салтак-влаклан шуко неле-йӧсым чыташ логалеш. Нуным мӧҥгыштӧ вучышо лишыл еҥыштланат куштылго огыл. Тидым Диана Мокеева шкеж гыч пала. 2022 ий февраль годсек пелашыж верч ойгырымо, тургыжланыме деч посна ик кечат ок эрте.
Диана ден Валерий 11 ий ончыч ече таҥасымаште палыме лийыныт. Стартым пуымо годым рвезе курткыжым лумыш шуэн коден улмаш. Диана тудым кидышкыже налын да Валерийым, финишыш толмешкыже, аважлан вучаш темлен. Тылеч вара ӱдыр ден рвезе палыме лийыныт, мутланаш тӱҥалыныт. Йыҥгыртен кутыреныт, соцкыллаште возкаленыт.
Диана Шернур район Нольыкмарий ялыште шочын, йоча пагытше Чылдемырыште эртен. А Валерий – Кужэҥер район Кугорнымбал ял гыч. 2021 ийыште ӱдыр-каче коклаште кыл эшеат пеҥгыдемын, тудо ийынак Диана качыжым армийыш ужатен.
2022 ийыште СВО тӱҥалмеке, Валерий воинский частьштак контрактым подписатлен да Шочмо элым аралымашке каен. Кызытат младший сержант Валерий Мокеев – тушто.
– Валерий СВО-ш кайымыж нерген мыланна каласенат, ешыже, мыят моткоч ӧрынна ыле. Но тудын койыш-шоктышыжо тыгай – шонен пыштен гын, нигузе чараш ок лий. Южгунам пеҥгыдылыкшылан ӧрам: тургыжлана гынат, луктын ок ончыкто, мӧҥгешла, мыйым лыпландараш тырша, – ойла Диана.
2023 ийыште мӧҥгыжӧ толмо годым Валерий Дианалан марлан лекташ темлен, да тудо ийынак сентябрьыште марий сӱаным тарватеныт. Самырык еш Москош илаш куснен – Валерийын служитлыме частьше тушто верланен. Ик ий да кум тылзе ончыч ешыште Мия ӱдырышт шочын. Тиде пиалан тат годым пӧръеҥ пелашыж воктене лийын кертын огыл гынат, азам ыштыме пӧрт гыч выписатлалтмышт кечылан толын шуын.
– Койышыж дене Мия – чылт ачаже, сынже денат тудымак поктен. Икшыве пелен Валерийын тыматлырак, ныжылгырак лиймыжым шижам, тудын пеҥгыдылыкше Мия воктене пуйто шулен йомеш.
Конешне, ача ӱдырнан кушмыжым ужын кушшо, шонем. Но кызыт жап тыгай, нимом от ыште, чытыман. Кажне кечын пелашем верч тургыжланем, тудын чыла сай лийже манын шонем. А Валерий, мыйым лыпландараш шонен, тусо нелылык нерген пешыже нимом ок каласкале. «Ит ойгыро, чыла сай лиеш. Мӧҥгӧ сеҥымаш дене пӧртылына» манын гына ойла, – чонжым почеш Диана.
Пӧръеҥын отпускшо жаплан Мокеевмыт ялыш шогаш толыт. Еш, родо-тукым дене пырля погынен, жапым эртарат. Тиде эн сай терапий манын палемда салтак.
Еш альбом гыч налме фото.