Дарья Картузован лӱмжым марий тӱвыраште эше шагалын палат. Ӱдыр эстраде аланыш шогалын веле. Йӱкшӧ яндар да виян, шарнымашеш кодшо. Мурызо семын ончыкылыкшо волгыдо, шонена.
Муро, фортепиано
Волжский район Купсола селаште шочын-кушшо Даша шым ияшыж годым Приволжский посёлкысо йоча сымыктыш школыш фортепиано классыш кошташ тӱҥалын. «Туныктышем Надежда Ивановна Савельевалан кугу тау. Тудлан кӧра шым ий жапыште музык деке путырак шӱмаҥынам», – ойла Д.Картузова.
2023 ийыште Марий кугыжаныш университетыште кыдалаш профессиональный образованийым пуышо специальность-влаклан тунемаш йӧн лектын. Дарья тунам, шуко шоныде, 9-ше класс деч вара «Музыкальное искусство эстрады» специальностьлан тунемаш пурен. Кызыт тудо 3-шо курсын чолга студенткыже.
Даша шкенжым тӱрлӧ конкурсышто шуара. Мутлан, ноябрьыште Йошкар-Олаште эртаралтше финн-угор калык-влакын эстраде мурыштым йоҥгалтарыше-шамычын «Ший памаш» IX регион-влак кокласе фестиваль-конкурсыштыжо I степенян лауреат лӱмым сулен.
Д.Картузова шкет веле огыл, тудо тыгак МарГУ-н «Сирены» ансамбльыштыже мура.
– Коллективна мемнан икоян. Пырля пашам ыштен, музыкант семын кушкам. Туге гынат шкет мураш чонемлан чотрак келша, – палдарыш ӱдыр.
Марий эстрадыш – икымше ошкыл
Даша марий муро-влакым колышташ йӧрата. Кажне артист шкешотан да уста, сандене иктаж-кӧн усталыкшым посна ойырен ом керт манын ойла. Пашаштыже шке стильжым мунеже. Кызытеш Д.Картузован «У кече» мурыжо Марий Эл радиошто йоҥга.
– Мутшым поэт Геннадий Сабанцев-Ояр возен, а семым Сергей Маков келыштарен. Тиде муро иктымат йӱштӧ чонаным ок кодо, шонем. Мурын шонымашыже тыглай, но келге: кажне кечым у ӱшан дене вашлийман, у кече – тиде у вий. А семже шыма да ныжыл.
Кызыт у мурым ямдылем. Но тудын нерген ойлаш эше эр, саскам тичмашын кӱын шуын огыл. Иктым каласен кертам: муро весела, – манеш Даша.
Самырык мурызо марий музык тӱняш у шӱлышым пуртынеже. Можыч, фолк, джаз, поп сынан муро дене усталыкшым пойдарынеже. Но Дарьян мутшо почеш тидым ышташале чот тунемман да тыршыман. Дуэт шотышто ойлаш гын, Эльфис Гараев дене пырля пашам ыштынеже.
Д.Картузован альбомжо гыч налме фото.