Кавун айдемылан веле огыл, вольыкланат пеш сай кочкыш, нӧшмыжӧ поснак пайдале. Вет тушто кукурбитацин манме вещества уло. Тудыжо гельминтым пытара.
Ик казалан кавун нӧшмым пел стакан дене вич кече почела пуаш лиеш. Нӧшмым эрыкташ огеш кӱл, тушто кукурбитацин эшеат шуко.
Казан шинчаже кукшо да пуалеш гын, А витамин огеш сите, а кавунышто тудо ситышын. Кавуным пӱчкеден пуыман.
Казавачалан кӱктымӧ кавуным пуаш сайрак. Кӱктымыштӧ фосфор кальций деч утларак. Фосфор пачалан пайдалырак.