Морко районысо Шӱргыял школышто Казаков лудмаш кажне ийын эртаралтеш. Тений тушто 20 йоча шке чолгалыкшым терген.
Шукынжо Миклай Казаковын почеламутшым марла лудыныт, а икмыняр тунемше рушлат йоҥгалтарен. Надежда Сергеева гын авторский номинацийыште шке усталыкшым ончыктен. Тудо шке почеламутыштыжо серен, кузе классышкышт туныктышыжо С.В.Гаврилова М.Казаковын почеламут сборникшым конден да йоча-влаклан «Киса» лӱман почеламутым лудын пуэн. Тунемше-влак чыланат ӧрын колышт шинченыт. А вара кажныже Казаков лудмашке ушнаш шонен пыштен. Тыге изи тунемше-влак почеламутым шкаланышт тавален-тавален ойыреныт.
Почеламут лудмаш пеш сылнын эртыш. Марий йылме туныктышо Елена Валериановна Григорьева шкежат М.Казаковын «Мый Москваште каем» почеламутшым шергылтарыш. Мемнамат сылнын лудаш кумылаҥдыш.
Тыге эн сылнын лудшо-влак коклаште М.Сергеева, Д.Сергеева, И.Павлов, Э.Новикова, Д.Скворцова, Я.Гаврилов, Т.Новиков, А.Анисимова да мый ойыртемалтна.
Стелла Кузнецова, «Марий сылнымут садвечыште» кружокын старостыже.
Снимкыште: Шӱргыял школышто эртаралтше Казаков лудмашын чолга участникше-влак.