Шыжым ВКонтакте соцкылысе лаштыкыштына «Шыже пакчасаска» конкурсым эртарышна. Тушко шукын ушненыт. Иктын пакчасаскаже кугу, весын — оҥай форман. Ятырын чапле кавуным куштеныт. А лудшына-влак туддене могай тамле кочкышым ямдылат?
Вероника Корчемкина, У Торъял район:
– Кавун дене мармеладым ыштем. Тидлан кӱлыт: 500 гр пӱчкедыме кавун, 1 апельсин, 1 стакан (250 гр) сакырложаш, 40 гр желатин, 150 гр шолтымо да йӱкшыктарыме вӱд.
Эрыктыме кавуным, изирак кубик семын пӱчкеден, каструльыш пыштыман. Тушкак пелыгыч пӱчмӧ апельсинын сокшым йоктарыман, вара комжымат пыштыман. Сакырложашым, вӱдым кавун дене тӧррак ешарен, 15 минутлан шолташ шындыман. Желатиным ончылгочак шолтымо да йӱкшыктарыме вӱдыш лазырташ пыштыман. Кавун пушкыдеммеке, апельсинын комжым кораҥдыман, лӧчышӧ желатиным ешарыман да блендер дене лугыман. Лугымо годым шоҥым кораҥдыман.
Формышко целлофаным шарыман да вишкыде мармеладым опталман. Пӧртысӧ температур марте йӱкшыктарымеке, холодильникыш пеҥгыдемаш шындыман. Мармеладым холодильник гыч лукман, ӱмбакыже сакырложашым шавалтыман, кумыктыман да целлофаным кораҥдыман. Адакат ӱмбач сакырложашым шавалтыман, кубик семын пӱчкедыман.
Кавун мармелад ямде!
Лудшына-влакын кавун дене моло рецептыштым 19 ноябрьыште лекше газетыште лудса.Кевыт