Шукерте огыл Шернур районышто СВО-н кум участникшылан шарнымаш оҥам почмо.
Эн ончычак Шӱдымарий школын пырдыжешыже тудын выпускникше Иван Валерьевич Смородиновын лӱмжым возыман оҥам пижыктыме. Тыгай шарнымашлан аваже да Олеся пелашыже кугу таум каласеныт. Акаже Татьяна Галкина «Верните память» мурым мурен, тушто йӧратыме шольым йомдарымаш, ойгырымаш, йӧратымаш шижалтыныт.
Тыгак Калий школыштат геройым шарнаш тӱҥалыт. Тушто Андрей Юрьевич Манаков лӱмеш мемориал оҥам вераҥдыме. Ты кечын Российын кугыжаныш флагшым геройын эргыже-влак нӧлталыныт.
Тыгак Шернур посёлкысо 1-ше номеран школышто шарнымашан церемоний эртаралтын. Тысе пырдыжеш Евгений Геннадьевич Алгаев лӱмеш шарнымаш оҥам пижыктеныт. Военнослужащийын шочшыжо-влак йӧратыме ачаштым йомдарыме нерген почеламутым лудын пуэныт. Нуно ачаштын кӱшыч эскерымыж да аралымыж нерген, тый мыланна от сите, ме тыйым эре шарнаш тӱҥалына манме шомак-влак йоҥгалтыныт.
«Кавашке чоҥештыше» герой-влаклан вуйым савена да нунын подвигыштым пример семын икте-весылан каласкалаш тӱҥалына.