Чугун каструльышто, казаныште, тыгак моло эмалироватлыме кӱмыжыштӧ ӱйым, когар палым кораҥдаш манын, шинчалым кучылтса. Тудо ӱйым сайын шупшеш, маныт. Каструль пундашке икмыняр кормыж шинчалым пыштыза да кагаз солык дене йыгыза. Тыгак тушко эше кӱмыж-совлам мушмо средствам изиш ешараш лиеш. Вара каструльым вӱд дене шӱалтыза.
Палемдыман:
-
Чугун каструльым шолдыра шинчал дене мушкаш кӱлеш.
-
Кеч-могай каструль (вурсан ынже лий) гыч йошкын ден когар палым кораҥдаш манын, тушто шинчал вӱдым 30-40 минут шолтыза: 1 литр вӱдлан 5-6 совла шинчал кӱлеш.
Лимон кислотам кучылташ лиеш. Но тудын дене эмалироватлыме каструльым, атым эрыкташ огыт темле.
Каструльышко вӱдым темыза, шолаш пурымеке, тушко 2 кугу совла лимон кислотам ешарыза да 15 минут шолтыза. Вара каструль пундашым, тудын ӧрдыж велжым йошкын деч эрыктыза.