16 верым верым пӱртӱс объект семын Марий Элыште регистрироватлыме. Нунын коклаште Карман курык, Зрыв ер, «Марий Чодра» национальный парк да молат…
Карман курык Морко район Овдасола ял воктене верланен. Курыкын йӱдвел да эрвел могыр тайылже поснак кугу да кӱкшӧ. Тушто доломит, известняк (татыр рок), шун, мергенлык, ошмагӱ-влак палдырнат. Тылеч посна тыште пӱртӱсыштӧ лийше тӱрлӧ кончышым ужыныт, курыкпомыш-влак лийыныт.
1976 ийыште Карман курыкым пӱртӱсын кугыжаныш памятникше семын пеҥгыдемденыт. МарГУ ден МарГТУ-н студентше-влак тыште учебно-просветительский да шанче пашам эртараш экологический корным ыштеныт. Тыге биологий да экологий дене тӱрлӧ темым шымлаш 15 станцийым, турист-влаклан каныме верым келыштареныт. Памаш йоген лекме верыште тавым кӱнченыт, вӱд шинчыме верлам эрыктеныт, вӱд да мланде могай улмым тергеныт.
Карман курык легенде да преданий денат чак кылдалтын. Марий тӱняште кумдан ончыкталтше мифический герой Овда, тысе ик курыкпомышышто илен, маныт. Ты курык тора гыч поснак сылнын да моторын коеш. Тышке тӱрлӧ кундем гыч турист-шамыч толыт, а районысо школлаште тунемше-влак курыкышто кажне ийын лиедат.