Российысе «Ты в игре» спорт проект-влак конкурсын полуфиналышкыже Марий Эл гыч кок проект: «Кубок городов на Волге» да «Йошкин КотоХод» – логалын. Конкурсыш 5060 паша пурен, 255 проектым ойыртемалтшылан шотленыт. Ынде профессионал жюри да калык йӱклымаш почеш сеҥыше-влакым икмыняр номинацийыште палемдат.
Марий Элыште «Йошкин КотоХод» йӱдвел скандинавский коштмаш да куржталмаш фестивальым икымше гана 2023 ийыште августышто эртареныт. Тушко элнан 25 тӱрлӧ олаж гыч 302 участник ушнен. Ты фестивальын организаторжо – Марий Элысе йӱдвел скандинавский коштмаш федерацийын (кызытеш общественный организаций семын пашам ышта) президентше Татьяна Рыбакова. Тудын дене проектын илышыш пурталтмыже да федерацийын пашаж нерген мутланышна.
Шонымаш шукталтын
Т.Рыбакован ойлымыж почеш, йӱдвел скандинавский коштмаш да куржталмаш фестивальым эртараш эн кугу шонымашыже лийын. Тидын шотышто тудо тыгерак палдарыш:
– Элна мучко спортын ты видшым йӧратыше-влакым иквереш чумырымо шуын. Тыге Йошкар-Олаште Россий кӱкшытан кугу фестивальым эртараш шонымаш шочын. Тушко уло еш дене ушненыт. Участник-шамыч тӱрлӧ кужытышто ӱчашеныт. Тыгак нуно лӱмын ямдылыме площадкыште шинчымашыштым пойдарен, концертым ончен, калык мастар-влакын ярмиҥгашкышт миен-толын, йоча да кугыеҥ-влаклан келыштаралтше туристический программыш ушнен кертыныт. Спортфестивальыш оксам тӱлыде ушнаш лийын. Ме участник-шамычлан скандинавский тоя-влакым прокатыш налаш йӧным ыштенна. Тений августышто тыгай мероприятийым эртараш палемденна.
2015 ий годсек
Кундемыштына скандинавский коштмаш дене тренировкым 2015 ийыште эртараш тӱҥалыныт. Тунам тудым «ЗдоровЯ» клуб социальный проект почеш илышыш шыҥдарен. Спортым йӧратыше-шамыч кажне ийын шукемыныт. Садлан Т.Рыбакова 2021 ийыште Марий Элыште скандинавский коштмаш дене федерацийым шке регистрироватлен да ты спортым виктарымылан утларак тӱткышым ойыраш тӱҥалын.
Ты жапыште тудлан кӧра элыштына да кундемыштына скандинавский тоя дене талын коштшо 1000 утла еҥым шуарыме да туныктымо, 13 профессионал инструкторым ямдылыме. Кызыт федерацийыште вич инструктор тырша. Пашашт нерген Татьяна тыгерак каласкалыш:
– 2020 ий годсек Йошкар-Оласе рӱдӧ каныме парк дене пашам пырля шуктена. Тыге парк кумдыкышто кумылан чыла еҥ-шамычлан скандинавский коштмаш дене мастер-классым арнялан ик гана эртарена. Ты ийынак икымше гана #ПАЛКИДЛЯЖИЗНИ фитнес мероприятий лийын. Тушко 15-55 ияш-шамыч ушненыт. Тыгодым ятыр еҥ уто нелытым «кудалтен». Тылеч посна ты спорт дене палдарыме да тудым вияҥдыме шотышто ятыр сомылым виктарена. Кызытеш ме кугыжаныш федераций семын огына шотлалт гынат, тидын шотышто кугу пашам вораҥдарена. Ӱшанена, лишыл кок ий жапыште чыла йодыш рашемдалтеш. Вет скандинавский коштмашым элыштына ятыр еҥ йӧратен шынден. Тӱҥжӧ – тудлан кӧра таза илыш-йӱлам кучышо-влак шукемыныт.
Тале спортсмен, организатор…
Татьяна Рыбакова самырык гынат, тудын ятыр сеҥымашыже да наградыже уло. 2019 ийыште тудо скандинавский коштмаш дене тӱнямбал турышто (World Cup Tour) икымше лийын. Тӱнямбалысе, Российысе шуко таҥасымаште чемпионко лӱмым налын. Профессионал тренер, тӱнямбал кӱкшытан инструктор. Ӱдыр тыгак, спортын ты видыштыже спортсмен-влаклан шуаралташышт курс-влакым ямдыла. Тудым кумылан-шамычлан онлайн да тыглай йӧн дене эртара. Спортивный туризмын йӱдвел коштмаш дисциплиныштыже Марий Элысе сборный командын ик тале спортсменкыже.
Тудын тыгак «Северная ходьба от новичка до инструктора» книгаже лектын. Палемдыман, ты пашаж дене событийный туризм дене Russian Travel Awards тӱнямбал конкурсышто кокымшо верым налын. Кундемыштына йӱдвел скандинавский коштмаш дене шуко социальный проектым илышыш шыҥдарен, эл да республик кӱкшытан ятыр мероприятийым, таҥасымашым организоватлен. Тудым Российысе форум ден конференцийыш спикер семын выступатлаш чӱчкыдын ӱжыт. «Забег.РФ», «Зелёный марафон» полумарафон-влакын амбассадорыштлан шотлалтеш.
Татьянан шуктымо пашажым шотленат пытарыш огеш лий. Тидлан ятыр вий да жап кӱлыт. А вет лач тыгай еҥ-шамычлан кӧра паша ончыко кая да сеҥымаш уло. Тугеже, ончыко гына!
Т.Рыбакован альбомжо гыч налме фото-влак.