Республикыштына образований системыште Йочан каныме идалыкшым пайремлын мучашленыт.
Ты мероприятийыште эртыше идалыкым иктешленыт да шушаш кеҥежымсе кампанийын пашажым радамленыт. Тыгак икшыве-влакын канышыштым организоватлаш полшымаште социальный партнёр, каныме организаций вуйлатыше, вожатый-шамычым саламленыт. Ты кышкарыштак стратегический сессий пашам ыштен. Тушто «Стратегия летнего отдыха 2026: концепция, задачи, перспективы», «Формула вожатского успеха», «Образований аланыште кӱлешан йодыш-влак» секцийла лийыныт.
Палемдыман, 2025 ийыште йоча-шамычын канышыштым да тазалыкыштым вияҥдаш полшымо сомыл кугу кышам коден. Тидланже «Артек» тӱнямбал рӱдерыште Марий Эл Республикын кечыжым пайремлымаш – ик эн кугу пример. Тушко регион Вуйлатыше Юрий Зайцеват ушнен. Тыгак кундемыштына союзный кугыжанышыште тунемше ӱдыр-рвезе-шамычлан туристский слётым эртарымашым палемдыман. Ты мероприятийыш Российын 35 регионжо да Беларусь республикын 7 областьше гыч 400 наре спортсмен толын. Тылеч посна кундемыштына «Кеҥеж» ресурс рӱдерым почмо. Тудо йоча-влаклан келыштаралтше регионысо организаций-шамычын пашаштым виктара. Вожатый-шамычым пашалан ямдылыме шотышто ик системым келыштарыме.
2025 ийыште Марий Элыште 29 тӱжем наре йоча канен. Тидыже – тылеч ончычсо ий дене таҥастарымаште 14,6 процентлан шукырак.
Марий Элысе Образований да науко министр Лариса Ревуцкаян палемдымыж почеш, Йочан каныме идалыкыштыже паша-влаклан негызым пыштымаш республикысе ӱдыр-рвезе-шамычын канышыштым да тазалыкыштым пеҥгыдемдаш сайынак полшышаш.
Россий Президент Владимир Путинын увертарымыж почеш, 2026 ий Калык-влакын икоян улмо идалык семын эрта. Образований системыште тудо Школ деч ончыч налме шинчымашын идалыкше семын лиеш.
Марий Элысе Образований да науко министерствын ВК-се тӱшкаж гыч налме фото.