Рӱдолаште шочшо да эн ончычак 1-ше номеран Йоча художественный школышто шуаралтше, а кызыт Йошкар-Оласе художественный училищыште пытартыш курсышто тунемше Ульяна Лебедеван «Праздник в городе» пашажым тений кӱкшын акленыт ыле. Ӱдырын Молодёжь кечым ончыктымо тиде сӱретше Российысе самырык художник-влакын конкурсыштышт «Профессионалы» номинацийыште икымше верым налын.
А тылеч ончыч июньышто У.Лебедева Крымысе «Таврида» арт-кластерыш икымше гана йодмашым пуымеке логалын. Тиддене Ульяна пеш кугешна. Тушто самырык сӱретче уло Россий гыч мийыше художник-влак да нунын опытышт дене палыме лийын. Ӱдыр ик арня жапыште молодёжный сменыште еҥ-влакын ура чонан улмыштым, оҥай мероприятий-влакым ужын да сылне пӱртӱсым аклен кертын. Мотор вершӧрыштӧ могай паша шочын манын йодмеке, Ульяна марий вургеман ӱдыр ден рвезын куштымашыштым сӧралын келыштарыме зарисовкыжым ончыктыш.
Студентке 2003 ий годсек Россий Художник ушемын Марий Элысе пӧлкажын молодёжный ушемыштыже шога. Тудо шке радынаже-влакым ятыр конкурс ден ончерыш луктын. Кодшо ийын да теният «Марийский край» выставкыш шке пашажым темлен. Сар пагытым тарватыме «Цена победы» картиныжым кызыт Изосымыктыш тоштерыште ужын кертыда.
– Мыланем сеҥымаш темым шӱм-чон гоч колтымо картине шерге. Тыгак шольым ден шӱжарем йоча годсо жапыш пӧртылаш да «Воспоминание» пашам сӱретлаш таратеныт. Яра жапемат сымыктыш дене кылдем: книгам лудам, комиксым ыштылам, южгунам анимаций дене шинчылтам, – ойла самырык сӱретче.
У.Лебедева тыршен тунемеш. Тидыжым 2023-2024 тунемме ийыште Марий Эл Республикым Вуйлатышын стипендиаткыже радамыш логалмыже пеҥгыдемда.
Мо оҥайже: Ульяна кандывуй (василёк)/ пеледышым йӧратымыжлан кӧра шкаланже «Василёк» псевдонимым налын. «Тудо мотор да шукыж дене ме икгай улына: тыглай, но тидын годымак ойыртемалтше», – мане марий ача-аван ӱдырышт.
Кодшо кеҥежым студент-влакын тунемме практикышт Санкт-Петербургышто лийын. Тунам, варажым эше ик гана Ульяна икмыняр зарисовкым ыштен. А такшым кызыт тудо Москош кайыме нерген шонкала, С.А.Гера́симов лӱмеш Российысе кинематографийын кугыжаныш университетышкыже аниматорлан тунемаш пурынеже.
Эльвира Терентьева.