2 август – Российыште юж десант войскаште служитлыше-влакын кечышт. Тиде кечым Андрей Курочкинат палемда.
Андрей Кужэҥер районысо Агытансола ялыште шочын-кушкын, Йӱледӱр кыдалаш школышто тунемын. Школ деч вара 2013 ий 4 июльышто вигак армийыш каен. Юж-десант войскаш логалын. Ондак Омск оласе младший сержант-влакым ямдылыме 242-шо тунемме рӱдерыште тунемын, а вара Псков оласе 76-шо десантно-штурмовой дивизийыш колтеныт.
– Индешымше классыште медосмотрым эртыме годым, ВДВ-шке логал кертат манын ойленыт. Тидлан мый чот куаненам. Тылеч ончыч мемнан родо-влак коклаште юж десант войскаште служитлыше лийын огыл.
Армийыште ик ий службым эртенам. Водитель-механик лийынам, танк дене кудалыштынам. Ныл гана парашют дене тӧрштенам. Тидлан ме ятыр ямдылалтынна. 30 метран вышке гыч чоҥештен волаш тунемынна, подвесной системыште кеченна. Мландыш кузе шогалман, вӱдыштӧ шкем кузе кучыман – чыла умылтареныт. Тыгак парашютым погаш тунеммынна. Икымше гана ме кечыгут погенна, а такшым норматив – 40 минут. Жап эртыме семын, чылалан тунемын шуынна, – каласыш Андрей.
– Икымше гана тӧрштымӧ годым могай шижмаш лийын?
– Тунам могай шижмаш чонышто озаланен, каласаш неле, но самолёт дене кӱшкӧ чоҥештен кӱзымеке, лӱдмашан лийын. Ушышто ик шонымаш гына пӧрдын: «Кузе тӧршташ?» А вара шонаш жап лийын огыл, тӧршташ кӱлын. Икымше гана ме 800 метр кӱкшыт гыч воленна, а варажым – 600 метр гыч.
– 600 да 800 метр кӱкшыт гыч мыняр жапыште волыман?
– Экипировко деч посна 40 секунд гыч ик минут наре. А десантникын рюкзак, автомат да чыла экипировко уло гын, писынрак волен шуэш. Икымше гана тӧрштымем годым йӱштӧ ден леве юж коклаш логалынам. Тунам мый иктаж вич секунд ик верыште кеченам, вара веле волаш тӱҥалынам.
– Юж десант войска кечым кузе палемдеда?
– Тиде кечын Йошкар-Оласе Воинский Чап мемориал ансамбль воктене построений лиеш, Курымашлык тул воктеке пеледышым пыштена. Вара йолташ-влак дене погынена.
Самырык-влаклан ялыште паша шагал, сандене Андрей армий гыч пӧртылмеке, Йошкар-Оласе шыл комбинатышке пашаш пурен. Тушто пашаеҥ-влакым шагалемдаш тӱҥалынытат, рвезе уэш пашам кычалаш тӱҥалын. Ынде идалыкат пеле МВД-ште полицейский-водительлан пашам ышта. Виктория пелашыж дене изи эргым ончен куштат.
Пайрем дене, Юж десант войскаште служитлыше-влак!