Марий Элым Вуйлатыше Ю.Зайцевын кӱштымыж почеш СВО участник-влакын аваштлан да пелашыштлан «Кичиер» санаторийыште смене пашам ышташ тӱҥалеш.
Тудо 12 гыч 25 сентябрь марте шуйна. Волжский районысо Кичиер ер воктенысе санаторийыште 150 ӱдырамашлан канаш да тазалыкым пеҥгыдемдаш йӧн пуалтеш. Республикым Вуйлатышын, тыгак Паша да калыкым социально аралыме министерствын полшымыштлан кӧра смене «Моторлык тӱням утара» программе почеш эртаралтеш.
Каныше-влак кок пачашан корпусышто илаш тӱҥалыт, номерлаште тидлан чыла условийым келыштарыме. Ӱдырамаш-влакым кечеш вич гана пукшат, нуно тӱрлӧ медицине услуго дене пайдаланен кертыт: вӱд да лавыра дене эмлалтмаш, капкылым эмлаш полшышо физкультур, массаж, аппаратный физиотерапий.
Санаторийыште вуйушым кандараш мероприятий-влакымат эртарат: йога дене занятий-влак, тӱрлӧ тренинг, «Антистресс» да «Детокс» программе-влаклан келыштарыме занятий-шамыч, усталык мастер-класс-влак. Смене годым тыгак моторлыкым арален кодаш полшышо процедур-влакым эртараш шонат, косметолог-влак шке услугыштым темлат. Тидлан оксам тӱлыман огыл.
Интернет гыч налме фото.