Коми Республикысе музыкально-драматический национальный театрын «Баба гожӧм» («Куван кеҥеж») лирический комедийжым критик-влак шке жанрже почеш келшен толшо да каналташ йӧршӧ манын каласышт. Но драматургий укелыкым чыланак пеҥгыдемдышт.
Санкт-Петербург гыч критик Э.Сивакован мутшо почеш, тушто режиссёрын шонкален моштымыжо ок шижалт, тыглай спектакль, чылажат ик шӱлыш денак эртыш. Драматургий ден режиссурын ваш кылдалтмышт ок кой, а такшым артист-влакын сайын мурымыштлан кумылаҥынам мане.
Моско критик М.Корчакым актрисе-влакын кажне случайыште ик семын коймышт, чурийыштышт шижмашым ончыктен моштыдымаш ойгаҥдарен. Татарстан гыч Н.Игламов спектакльыште действий кунам да кушто кайыме раш огыл, герой-влакын социальный статусышт уке, тыгак коми-влакын мотор национальный костюм дене эре улмышт чын илышым огеш ончыкто мане.
Чылаштлан сценографий келшен. Тудым чот волгыдо огыл тӱсан куымо солык, ӱштӧ да шартыш, тулеч моло куымо арвер дене сӧрастарыме. Чынак, куандарыше. Но тудо костюм дене икгай сынан огыл, маньыч. Тыгак икымше актым кӱчыкемдаш кӱлмӧ нерген ойлышт. Тушто действий укелык шижалте.
Тӱҥ рольым, Васям, модшо артист Александр Ветошкин нерген моктеммут шукак ыле. Тудо да моло артистат «Парма» фольклорно-этнографический ансамбльыш коштыт. Мурымаш ден куштымаш спектакльлан ямым пуртышт. Тыгодым Александр икмыняр мурым шке возен. Тыгак тудо коми калыкын семӱзгарже-влакымат ятыр ий шке ышта, нунын дене шоктенат мошта. А спектакльыште артист Александр Канев дене пырля гармоньым шоктат. Мо оҥайже: А.Ветошкин лӱмын ты спектакльлан гармонь дене шокташ шкеак тунемын.
Васян йӧратыме Настяжым модшо актрисе В.Соколова денат мутланышна. Тудо Йошкар-Олашке «Майатул» фестивальыш ятыр гана толын, шке мастарлыкшым шуараш эре ямде, критик-влакын ойлымышт эре шерге, мане.
Ты театрын историйже шкешотан: тудым «Парма» ансамбль гыч ыштыме. Эн куандарышыже: иктаж вич ий лиеш, театрлан посна верым ойырымо. Самырык артист-влакат улыт, кок тӱшка тунем лектын. Фестивальыш толшо уста да лӱмлӧ артист-влак деч нунат мастарлыкым погат.
А кӧ тиде спектакльым ончен да театрыш каналташ толын, тудо коми калыкын мурымаш ден куштымашыж дене палыме лийын, сӧрал вургемыштым, пашаштым ужын, куанен каен, шонем.
Эльвира Терентьева.