Морко район Волаксола ялыште шочын-кушшо Полина Дмитриеван илышыштыжат Российысе студенческий отрядлаште лийме жап поро да сай кышам коден.
9-ше класс деч вара ӱдыр Йошкар-Оласе сервисный технологий техникумышто дизайнерлан тунемын. А вара МарГУ-шко пурен. 2020-2024 ийлаште «Профессиональный образованийын педагогшо» специальностьым да «Декоративно-прикладной сымыктыш да дизайн» профиль дене шинчымашым налын.
Проводнице
Студотрядыш логалмыж нерген Полина тыге каласкалыш:
– Икымше гана студотряд дене проводниклан пашам ышташ 2021 ийыште каенам. Тунам мый икымше курсым гына пытаренам ыле. Адлер ола гыч поездыште тӱрлӧ направлений дене кудалыштынам. Тӱҥалтыште чот нелын чучын, нигунам тышке ом тол манынат шонкаленам. А тылзе пашам ыштымеке (а чылаже кум тылзе тыршыме), ты паша келшен шинчын. Тушеч кумылаҥше пӧртылмекем, мыйым проводник-влакын студотрядыштын командирыштлан шогалтеныт. Ик идалык ты сомылым шуктенам.
Вес ийынжат проводницыланак тыршенам. А кумшо ийын Федеральный пассажирский компаний ден «Гранд Сервис экспресс» компаний гоч пашам ышташ миенам. Крым гыч кудалыштынна. Тушто лийме кузе ок келше?!
Теният апрель гыч июнь марте проводницылан тыршенам. Лектеш: ныл гана тыгай пашам шуктен онченам, ятыр верым ужынам. Лийме кажне ола гыч магнитикым конденам, ынде ик коробка погынен.
Шым тӱжем меҥге торашке…
– 2024 ийыште МарГУ-м тунем пытаренам да Камчаткым ужын толмо шонымаш дене колым перерабатыватлыме пашам шукташ каенам. Мутат уке, куштылго лийын огыл.
Эн ончычак Камчаткыш миен толаш, курыкым, вулканым, сопкым, гейзер верлам ужаш шоненам. Чыла тыгак лийын огыл, но мотор пӱртӱс манын кертам.
Санденак эртыме корнемым угыч шижаш кокымшо гана Камчаткыш тарванышым. Икымше ийысе семын ты вер шӱм-чонем авалтен огыл гынат, но садак ум пален налынам. Камчатка пӱртӱсшӧ дене куандарен да ӧрыктарен.
Тений тушко тӱрлӧ республик гыч 150 студент миенна да кок смене дене пашам ыштенна. Кандаш шагат тыршенна, кандаш шагат каненна, но тышеч 4-5 шагат веле малаш кодеден. Мемнам кечеш кум гана пукшеныт. Индеш шагат ойыртемлан ондак тунемын шуаш кӱлын.
Кодшо ийын мӧртньым обрабатыватлымаште гына лийынам гын, тений чыла позицийыштат пашам ыштен онченам.
Тенийлан сай кол тургымым сӧреныт ыле. Ик арня чарныде пашам ыштышна. А вара 30 июльышто мланде чытырналтын, да кол-шамыч шылын каеныт. Тыге 2024 ийысе семынак канен-канен тыршенна.
Пашалан кумыл полша
– Кок пашам ончалаш гын, проводницын сомылжо куштылгырак. Вагоным мый пӧрт дене таҥастарем. Тушко уна-шамычым пуртет, но тыгодымак кажныжын койышыжо, йодмашыже – тӱрлӧ. Нунылан сай йӧным ыштет. Удамат тӧрлаш логалеш. Тӱҥжӧ – поездысе вагон гыч пассажир весела чуриян кайышаш.
А Камчаткыште ме Соболевский районышто «Камбер» заводышто пашам ыштенна. Ты сомылым пӱтынек гаяк автоматизироватлыме. Эн ончычак шкенан базышкына наҥгаят, договорым ыштат, формым пуат. Икмыняр кече гыч заводыш наҥгаят: ныл шагат вахтовко автобус дене кудалына, ныл шагат куп да эҥерла гоч – гусеничный транспорт дене.
Кодшо ийын икымше сменыште пашам ыштенам. А тений мылам «Сменын комиссарже» должностьым пуэныт да кокымшо сменыш колтеныт. Шке сменыштына «Целинный 8 Март», «Целинный 23 февраль», «Сантын тайныже, У ий» мероприятий-влакым, викториным эртаренна. Ойыртемалтше-шамычлан пӧлекым пуэденна. Сандене смене деч вара маленат омыл, программым, реквизитым монь ямдыленам.
Мый шке илышем студотряд дене кылдымемлан пырчат ом чамане. Российысе студотряд улмылан да студент годым тыгай йӧным пуымылан куанем да тауштем. Самырык-шамычлан тудым кучылташак тыланем.
Тора Камчаткыште марий ӱдырын элнан тӱрлӧ кундемже гыч мийыше студент-шамычлан кугурак акашт семын тыршаш верештын. Тидыже, мутат уке, тудым сай опыт дене пойдарен.
Российысе студенческий отрядын (РСО) направленийже-влак:
-
Педагогический отряд. Боец-влак йоча лагерьлаште тунемше-влакын канышыштым эртараш полшат.
-
Проводник-влакын отрядышт. Кӱртньыгорнысо пассажир вагонлаште проводниклан пашам ыштат.
-
Строительный отряд. Боец-влак элнан чоҥымо объектлаштыже тӱрлӧ пашазе должностьыштыжо (плотник, сварщик, монтажник да молат) тыршат.
-
Сервисный отряд. Тыште паша унам ончымо дене кылдалтын: нуно унагудо ден ресторанлаште, кочмывер ден каныме верлаште уна-шамычым обслуживатлат.
-
Ялозанлык отряд. Боец-влак ӱдымӧ да тургымысо урожайым погымо, колым перерабатыватлыме пашам шуктат, вольык ончымо пашаште ветеринар ден зоотехникым вашталтат.
-
Медицине отряд. Медсестра ден медбратлан, санитарлан, администраторлан пашам ыштат.
-
Подростко-влакын отрядышт. Колледжласе студент ден тунемше-влаклан икымше профессионал опытым налаш йӧным ыштыме.
-
Производственный отряд. Студент-влак элнан тӱҥ заводлаштыже да обороно комплексысе предприятийлаште производственный специальностьла дене профессиональный шинчымашым оксам тӱлыде налыт.
Полинан альбомжо гыч налме фото.