Марий калыкнан тӱвыра поянлыкше виян лийже манын, ме тудым сайын палышаш улына. А тидлан шке кугезе вожым аклаш кӱлеш. Лач ты амал дене ий гыч ийыш кундемыштына «Кугезе вож» республик кӱкшытан фестиваль эртаралтеш.
Ты фестивальыште кажне тӱвыра пӧртын фольклор ансамбльже усталыкшым ончыктен кертеш. Тудо таҥасымаш семын эрта. Номинаций тӱрлӧ: эн сай сценарий, модыш, пайрем программе да тулеч молат. Чыла тидлан шке фольклор ансамбльым кузе ямдылен шогымо нерген 6-8 октябрьыште Йошкар-Олаште республик кӱкшытан семинар-практикум годым палдарыме. Кажне район гыч кок фольклор коллектив вуйлатыше лийын. Морко кундемна гыч Унчо да Кораксола тӱвыра пӧрт пеленысе фольклор ансамбльын вуйлатышышт миенна.
Семинар-практикумлан Марий Элысе Тӱвыра, печать да калык-влакын пашашт шотышто министерстве, Калык усталык рӱдер вуйын шогеныт. И.С.Палантай лӱмеш тӱвыра да сымыктыш колледж пеш кугу надырым пыштен. Семинар-практикум жапыштак Марий самырык театрын сценыштыже «Финно-угорский транзит» фестиваль эртен. Тыгак Медведево посёлкысо тӱвыра полатын пашаж дене палыме лияш сай ыле. «Эр ӱжара», «Весела кумыл» да «Тулойып» фольклор ансамбль-влакын усталыкыштым пример семын ужмо. Мастер-класс-влак лийыныт. Тыгак семинар-практикум годым марий калык вургемын ойыртемже, ойпогыж нерген шуко у материалым пален налынна. Чыла тидым шке пашашкынат шыҥдарен моштена гын, моткочак сай лиеш.
Тек марий калыкнан кугезе вожшо пеҥгыде лиеш да одарланен шога.
Елена Григорьева, Кораксола тӱвыра пӧрт вуйлатыше.
Снимкыште: республик кӱкшытан семинар-практикумыш чыла кундем гыч чумыргышо эн чолга еҥ-влак.