Йошкар-Олаште Курчак театрыште «Калыкын чонжо» премийын лауреатше-влакым палемденыт. Сеҥыше-шамычым Марий Эл Правительстве Председательын алмаштышыже – тӱвыра, печать да калык-влакын пашашт шотышто министр К.Иванов палемден.
«Калык куштымаш» номинацийыште «Онар» йоча калык куштымаш ансамбльым вуйлатыше Андрей Дмитриев (Йошкар-Ола) сеҥен. «Звениговские зори» ветеран-влак калык хорын хормейстерже Светлана Вяткина «Калык мурымаш» номинацийыште палемдалтын.
«Традиционный калык культур» номинацийыште премийым «Юл сем» фольклор ансамбльым вуйлатыше Анатолий Мартыновлан (Провой кундем) пуэныт. «Калык инструментальный музык» номинацийыште «Изи памаш» образцовый фольклор ансамбльын концертмейстерже Родион Алексеев (Йошкар-Ола) сеҥен.
«Театральное творчество» номинацийыште премийым «Рампа» калык театрым вуйлатыше Татьяна Басовалан (Советский район) пуэныт. «Калык мастар» номинацийыште «Вышивка» студийым вуйлатыше София Крючкова (Курыкмарий район) сеҥен.